പഴയ നിയമംMOV
1യഹോവയ്ക്ക് ഒരു പുതിയ പാട്ടു പാടുവിന്‍; സകല ഭൂവാസികളുമായുള്ളോരേ, യഹോവയ്ക്കു പാടുവിന്‍.
2യഹോവയ്ക്കു പാടി അവന്‍റെ നാമത്തെ വാഴ്ത്തുവിന്‍; നാള്‍തോറും അവന്‍റെ രക്ഷയെ പ്രസിദ്ധമാക്കുവിന്‍.
3ജാതികളുടെ ഇടയിൽ അവന്‍റെ മഹത്ത്വവും സകല വംശങ്ങളുടെയും ഇടയിൽ അവന്‍റെ അദ്ഭുതങ്ങളും വിവരിപ്പിന്‍.
4യഹോവ വലിയവനും ഏറ്റവും സ്തുത്യനും ആകുന്നു; അവന്‍ സകല ദേവന്മാരെക്കാളും ഭയപ്പെടുവാന്‍ യോഗ്യന്‍.
5ജാതികളുടെ ദേവന്മാരൊക്കെയും മിഥ്യാമൂര്‍ത്തികളത്രേ; യഹോവയോ ആകാശത്തെ ഉണ്ടാക്കിയിരിക്കുന്നു.
6ബഹുമാനവും തേജസ്സും അവന്‍റെ മുമ്പിലും ബലവും ശോഭയും അവന്‍റെ വിശുദ്ധമന്ദിരത്തിലും ഉണ്ട്.
7ജാതികളുടെ കുലങ്ങളേ, യഹോവയ്ക്കു കൊടുപ്പിന്‍; മഹത്ത്വവും ബലവും യഹോവയ്ക്കു കൊടുപ്പിന്‍.
8യഹോവയ്ക്ക് അവന്‍റെ നാമത്തിനു തക്ക മഹത്ത്വം കൊടുപ്പിന്‍; തിരുമുൽക്കാഴ്ചയുമായി അവന്‍റെ പ്രാകാരങ്ങളിൽ ചെല്ലുവിന്‍.
9വിശുദ്ധ വസ്ത്രാലങ്കാരത്തോടെ യഹോവയെ നമസ്കരിപ്പിന്‍; സകല ഭൂവാസികളുമായുള്ളോരേ, അവന്‍റെ മുമ്പിൽ നടുങ്ങുവിന്‍.
10യഹോവ വാഴുന്നു എന്നു ജാതികളുടെ ഇടയിൽ പറവിന്‍; ഭൂലോകവും ഇളകാതെ ഉറച്ചുനില്ക്കുന്നു; അവന്‍ ജാതികളെ നേരോടെ വിധിക്കും.
11ആകാശം സന്തോഷിക്കയും ഭൂമി ആനന്ദിക്കയും സമുദ്രവും അതിന്‍റെ നിറവും മുഴങ്ങുകയും ചെയ്യട്ടെ.
12വയലും അതിലുള്ളതൊക്കെയും ആഹ്ലാദിക്കട്ടെ; അപ്പോള്‍ കാട്ടിലെ സകല വൃക്ഷങ്ങളും ഉല്ലസിച്ചുഘോഷിക്കും.
13യഹോവയുടെ സന്നിധിയിൽ തന്നെ; അവന്‍ വരുന്നുവല്ലോ; അവന്‍ ഭൂമിയെ വിധിപ്പാന്‍ വരുന്നു; അവന്‍ ഭൂലോകത്തെ നീതിയോടും ജാതികളെ വിശ്വസ്തതയോടുംകൂടെ വിധിക്കും.