പഴയ നിയമംMOV
1യഹോവേ, ഞാന്‍ നിന്നിൽ ആശ്രയിക്കുന്നു; ഞാന്‍ ഒരുനാളും ലജ്ജിച്ചുപോകരുതേ.
2നിന്‍റെ നീതിനിമിത്തം എന്നെ ഉദ്ധരിച്ചു വിടുവിക്കേണമേ; നിന്‍റെ ചെവി എങ്കലേക്കു ചായിച്ച് എന്നെ രക്ഷിക്കേണമേ.
3ഞാന്‍ എപ്പോഴും വന്നു പാര്‍ക്കേണ്ടതിനു നീ എനിക്ക് ഉറപ്പുള്ള പാറയായിരിക്കേണമേ; എന്നെ രക്ഷിപ്പാന്‍ നീ കല്പിച്ചിരിക്കുന്നു; നീ എന്‍റെ പാറയും എന്‍റെ കോട്ടയും ആകുന്നുവല്ലോ.
4എന്‍റെ ദൈവമേ, ദുഷ്ടന്‍റെ കൈയിൽനിന്നും നീതികേടും ക്രൂരതയും ഉള്ളവന്‍റെ കൈയിൽനിന്നും എന്നെ വിടുവിക്കേണമേ.
5യഹോവയായ കര്‍ത്താവേ, നീ എന്‍റെ പ്രത്യാശയാകുന്നു; ബാല്യംമുതൽ നീ എന്‍റെ ആശ്രയം തന്നെ.
6ഗര്‍ഭംമുതൽ നീ എന്നെ താങ്ങിയിരിക്കുന്നു; എന്‍റെ അമ്മയുടെ ഉദരത്തിൽനിന്ന് എന്നെ എടുത്തവന്‍ നീ തന്നെ; എന്‍റെ സ്തുതി എപ്പോഴും നിന്നെക്കുറിച്ചാകുന്നു;
7ഞാന്‍ പലര്‍ക്കും ഒരദ്ഭുതം ആയിരിക്കുന്നു; നീ എന്‍റെ ബലമുള്ള സങ്കേതമാകുന്നു.
8എന്‍റെ വായ് നിന്‍റെ സ്തുതികൊണ്ടും ഇടവിടാതെ നിന്‍റെ പ്രശംസകൊണ്ടും നിറഞ്ഞിരിക്കുന്നു.
9വാര്‍ധക്യകാലത്തു നീ എന്നെ തള്ളിക്കളയരുതേ; ബലം ക്ഷയിക്കുമ്പോള്‍ എന്നെ ഉപേക്ഷിക്കയുമരുതേ.
10എന്‍റെ ശത്രുക്കള്‍ എന്നെക്കുറിച്ചു സംസാരിക്കുന്നു; എന്‍റെ പ്രാണഹാനിക്കായി കാത്തിരിക്കുന്നവര്‍ കൂടിയാലോചിക്കുന്നു.
11ദൈവം അവനെ ഉപേക്ഷിച്ചിരിക്കുന്നു; പിന്തുടര്‍ന്നു പിടിപ്പിന്‍; വിടുവിപ്പാന്‍ ആരുമില്ല എന്ന് അവര്‍ പറയുന്നു.
12ദൈവമേ, എന്നോട് അകന്നിരിക്കരുതേ; എന്‍റെ ദൈവമേ, എന്നെ സഹായിപ്പാന്‍ വേഗം വരേണമേ.
13എന്‍റെ പ്രാണനു വിരോധികളായവര്‍ ലജ്ജിച്ചു നശിച്ചുപോകട്ടെ; എനിക്ക് അനര്‍ഥം അന്വേഷിക്കുന്നവര്‍ നിന്ദകൊണ്ടും ലജ്ജകൊണ്ടും മൂടിപ്പോകട്ടെ.
14ഞാനോ എപ്പോഴും പ്രത്യാശിക്കും; ഞാന്‍ മേല്ക്കുമേൽ നിന്നെ സ്തുതിക്കും.
15എന്‍റെ വായ് ഇടവിടാതെ നിന്‍റെ നീതിയെയും രക്ഷയെയും വര്‍ണിക്കും; അവയുടെ സംഖ്യ എനിക്ക് അറിഞ്ഞുകൂടാ.
16ഞാന്‍ യഹോവയായ കര്‍ത്താവിന്‍റെ വീര്യപ്രവൃത്തികളോടുകൂടെ വരും; നിന്‍റെ നീതിയെ മാത്രം ഞാന്‍ കീര്‍ത്തിക്കും.
17ദൈവമേ, എന്‍റെ ബാല്യംമുതൽ നീ എന്നെ ഉപദേശിച്ചിരിക്കുന്നു; ഇന്നുവരെ ഞാന്‍ നിന്‍റെ അദ്ഭുതപ്രവൃത്തികളെ അറിയിച്ചുമിരിക്കുന്നു.
18ദൈവമേ, അടുത്ത തലമുറയോടു ഞാന്‍ നിന്‍റെ ഭുജത്തെയും വരുവാനുള്ള എല്ലാവരോടും നിന്‍റെ വീര്യപ്രവൃത്തിയെയും അറിയിക്കുവോളം വാര്‍ധക്യവും നരയും ഉള്ള കാലത്തും എന്നെ ഉപേക്ഷിക്കരുതേ.
19ദൈവമേ, നിന്‍റെ നീതിയും അത്യുന്നതമായിരിക്കുന്നു; മഹാകാര്യങ്ങളെ പ്രവര്‍ത്തിച്ചിട്ടുള്ള ദൈവമേ, നിന്നോടു തുല്യന്‍ ആരുള്ളൂ?
20അനവധി കഷ്ടങ്ങളും അനര്‍ഥങ്ങളും ഞങ്ങളെ കാണുമാറാക്കിയവനേ, നീ ഞങ്ങളെ വീണ്ടും ജീവിപ്പിക്കും; ഭൂമിയുടെ ആഴങ്ങളിൽനിന്നു ഞങ്ങളെ തിരികെ കയറ്റും.
21നീ എന്‍റെ മഹത്ത്വം വര്‍ധിപ്പിച്ചു എന്നെ വീണ്ടും ആശ്വസിപ്പിക്കേണമേ.
22എന്‍റെ ദൈവമേ, ഞാനും വീണകൊണ്ട് നിന്നെയും നിന്‍റെ വിശ്വസ്തതയെയും സ്തുതിക്കും; യിസ്രായേലിന്‍റെ പരിശുദ്ധനായുള്ളോവേ, ഞാന്‍ കിന്നരംകൊണ്ടു നിനക്കു സ്തുതിപാടും.
23ഞാന്‍ നിനക്കു സ്തുതി പാടുമ്പോള്‍ എന്‍റെ അധരങ്ങളും നീ വീണ്ടെടുത്ത എന്‍റെ പ്രാണനും ഘോഷിച്ചാനന്ദിക്കും.
24എന്‍റെ നാവും ഇടവിടാതെ നിന്‍റെ നീതിയെക്കുറിച്ചു സംസാരിക്കും; എനിക്ക് അനര്‍ഥം അന്വേഷിക്കുന്നവര്‍ ലജ്ജിച്ചു ഭ്രമിച്ചുപോയിരിക്കുന്നു.