പഴയ നിയമംMOV
1ഒരു ഗീതം. കോരഹ്പുത്രന്മാരുടെ ഒരു സങ്കീര്‍ത്തനം. [1] നമ്മുടെ ദൈവത്തിന്‍റെ നഗരത്തിൽ, അവന്‍റെ വിശുദ്ധപര്‍വതത്തിൽ യഹോവ വലിയവനും അത്യന്തം സ്തുത്യനും ആകുന്നു.
2മഹാരാജാവിന്‍റെ നഗരമായി ഉത്തരഗിരിയായ സീയോന്‍പര്‍വതം ഉയരംകൊണ്ടു മനോഹരവും സര്‍വഭൂമിയുടെയും ആനന്ദവുമാകുന്നു.
3അതിന്‍റെ അരമനകളിൽ ദൈവം ഒരു ദുര്‍ഗമായി വെളിപ്പെട്ടുവന്നിരിക്കുന്നു.
4ഇതാ, രാജാക്കന്മാര്‍ കൂട്ടംകൂടി; അവര്‍ ഒന്നിച്ചു കടന്നുപോയി.
5അവര്‍ അതുകണ്ട് അമ്പരന്നു, അവര്‍ പരിഭ്രമിച്ച് ഓടിപ്പോയി.
6അവര്‍ക്ക് അവിടെ വിറയൽ പിടിച്ചു; നോവു കിട്ടിയവള്‍ക്കെന്നപോലെ വേദന പിടിച്ചു.
7നീ കിഴക്കന്‍കാറ്റുകൊണ്ട് തര്‍ശ്ശീശ് കപ്പലുകളെ ഉടച്ചുകളയുന്നു. നാം കേട്ടതുപോലെ തന്നെ സൈന്യങ്ങളുടെ യഹോവയുടെ നഗരത്തിൽ,
8നമ്മുടെ ദൈവത്തിന്‍റെ നഗരത്തിൽ കണ്ടിരിക്കുന്നു; ദൈവം അതിനെ സദാകാലത്തേക്കും സ്ഥിരമാക്കുന്നു. സേലാ.
9ദൈവമേ, നിന്‍റെ മന്ദിരത്തിന്‍റെ മധ്യേ ഞങ്ങള്‍ നിന്‍റെ ദയയെക്കുറിച്ച് ചിന്തിക്കുന്നു.
10ദൈവമേ, നിന്‍റെ നാമംപോലെ തന്നെ നിന്‍റെ സ്തുതിയും ഭൂമിയുടെ അറ്റങ്ങളോളം എത്തുന്നു; നിന്‍റെ വലംകൈയിൽ നീതി നിറഞ്ഞിരിക്കുന്നു.
11നിന്‍റെ ന്യായവിധികള്‍നിമിത്തം സീയോന്‍ പര്‍വതം സന്തോഷിക്കയും യെഹൂദാപുത്രിമാര്‍ ആനന്ദിക്കയും ചെയ്യുന്നു.
12സീയോനെ ചുറ്റിനടന്നു പ്രദക്ഷിണം ചെയ്‍വിന്‍; അതിന്‍റെ ഗോപുരങ്ങളെ എണ്ണുവിന്‍.
13വരുവാനുള്ള തലമുറയോട് അറിയിക്കേണ്ടതിന് അതിന്‍റെ കൊത്തളങ്ങളെ സൂക്ഷിച്ച് അരമനകളെ നടന്നു നോക്കുവിന്‍.
14ഈ ദൈവം എന്നും എന്നേക്കും നമ്മുടെ ദൈവമാകുന്നു; അവന്‍ നമ്മെ ജീവപര്യന്തം വഴിനടത്തും.