പഴയ നിയമംMOV
1ദാവീദിന്‍റെ ഒരു ജ്ഞാപക സങ്കീര്‍ത്തനം. [1] യഹോവേ, ക്രോധത്തോടെ എന്നെ ശിക്ഷിക്കരുതേ; ഉഗ്രനീരസത്തോടെ എന്നെ ദണ്ഡിപ്പിക്കയുമരുതേ.
2നിന്‍റെ അസ്ത്രങ്ങള്‍ എന്നിൽ തറച്ചിരിക്കുന്നു; നിന്‍റെ കൈ എന്‍റെമേൽ ഭാരമായിരിക്കുന്നു.
3നിന്‍റെ നീരസം ഹേതുവായി എന്‍റെ ദേഹത്തിൽ സൗഖ്യമില്ല; എന്‍റെ പാപം ഹേതുവായി എന്‍റെ അസ്ഥികളിൽ സ്വസ്ഥതയുമില്ല.
4എന്‍റെ അകൃത്യങ്ങള്‍ എന്‍റെ തലയ്ക്കുമീതെ കവിഞ്ഞിരിക്കുന്നു; ഭാരമുള്ള ചുമടുപോലെ അവ എനിക്ക് അതിഘനമായിരിക്കുന്നു.
5എന്‍റെ ഭോഷത്തം ഹേതുവായി എന്‍റെ വ്രണങ്ങള്‍ ചീഞ്ഞുനാറുന്നു.
6ഞാന്‍ കുനിഞ്ഞ് ഏറ്റവും കൂനിയിരിക്കുന്നു; ഞാന്‍ ഇടവിടാതെ ദുഃഖിച്ചുനടക്കുന്നു.
7എന്‍റെ അരയിൽ വരള്‍ച്ച നിറഞ്ഞിരിക്കുന്നു; എന്‍റെ ദേഹത്തിൽ സൗഖ്യമില്ല.
8ഞാന്‍ ക്ഷീണിച്ച് അത്യന്തം തകര്‍ന്നിരിക്കുന്നു; എന്‍റെ ഹൃദയത്തിലെ ഞരക്കം നിമിത്തം ഞാന്‍ അലറുന്നു.
9കര്‍ത്താവേ, എന്‍റെ ആഗ്രഹമൊക്കെയും നിന്‍റെ മുമ്പിൽ ഇരിക്കുന്നു. എന്‍റെ ഞരക്കം നിനക്കു മറഞ്ഞിരിക്കുന്നതുമില്ല.
10എന്‍റെ നെഞ്ചിടിക്കുന്നു; ഞാന്‍ വശംകെട്ടിരിക്കുന്നു; എന്‍റെ കണ്ണിന്‍റെ വെളിച്ചവും എനിക്കില്ലാതെയായി.
11എന്‍റെ സ്നേഹിതന്മാരും കൂട്ടുകാരും എന്‍റെ ബാധ കണ്ടു മാറിനില്ക്കുന്നു; എന്‍റെ ചാര്‍ച്ചക്കാരും അകന്നു നില്ക്കുന്നു.
12എനിക്കു പ്രാണഹാനി വരുത്തുവാന്‍ നോക്കുന്നവര്‍ കെണി വയ്ക്കുന്നു; എനിക്ക് അനര്‍ഥം അന്വേഷിക്കുന്നവര്‍ വേണ്ടാതനം സംസാരിക്കുന്നു; അവര്‍ ഇടവിടാതെ ചതിവു ചിന്തിക്കുന്നു.
13എങ്കിലും ഞാന്‍ ചെകിടനെപ്പോലെ കേള്‍ക്കാതെ ഇരുന്നു; വായ് തുറക്കാതെ ഊമനെപ്പോലെ ആയിരുന്നു.
14ഞാന്‍, കേള്‍ക്കാത്ത മനുഷ്യനെപ്പോലെയും വായിൽ പ്രതിവാദമില്ലാത്തവനെപ്പോലെയും ആയിരുന്നു.
15യഹോവേ, നിങ്കൽ ഞാന്‍ പ്രത്യാശ വച്ചിരിക്കുന്നു; എന്‍റെ ദൈവമായ കര്‍ത്താവേ, നീ ഉത്തരം അരുളും.
16അവര്‍ എന്നെച്ചൊല്ലി സന്തോഷിക്കരുതേ എന്നു ഞാന്‍ പറഞ്ഞു; എന്‍റെ കാൽ വഴുതുമ്പോള്‍ അവര്‍ എന്‍റെ നേരേ വമ്പു പറയുമല്ലോ.
17ഞാന്‍ ഇടറി വീഴുമാറായിരിക്കുന്നു; എന്‍റെ ദുഃഖം എപ്പോഴും എന്‍റെ മുമ്പിൽ ഇരിക്കുന്നു.
18ഞാന്‍ എന്‍റെ അകൃത്യത്തെ ഏറ്റുപറയുന്നു; എന്‍റെ പാപത്തെക്കുറിച്ചു ദുഃഖിക്കുന്നു.
19എന്‍റെ ശത്രുക്കളോ ജീവനും ബലവുമുള്ളവര്‍. എന്നെ വെറുതെ പകയ്ക്കുന്നവര്‍ പെരുകിയിരിക്കുന്നു.
20ഞാന്‍ നന്മ പിന്തുടരുകയാൽ അവര്‍ എനിക്കു വിരോധികളായി നന്മയ്ക്കുപകരം തിന്മ ചെയ്യുന്നു.
21യഹോവേ, എന്നെ കൈവിടരുതേ: എന്‍റെ ദൈവമേ, എന്നോടകന്നിരിക്കരുതേ.
22എന്‍റെ രക്ഷയാകുന്ന കര്‍ത്താവേ, എന്‍റെ സഹായത്തിനു വേഗം വരേണമേ.