സദൃശവാക്യങ്ങള്‍ 26

¹വേനൽക്കാലത്തു ഹിമവും കൊയ്ത്തുകാലത്തു മഴയും എന്നപോലെ ഭോഷനു ബഹുമാനം പൊരുത്തമല്ല.

²കുരികിൽ പാറിപ്പോകുന്നതും മീവൽപ്പക്ഷി പറന്നുപോകുന്നതുംപോലെ കാരണം കൂടാതെ ശാപം പറ്റുകയില്ല.

³കുതിരയ്ക്കു ചമ്മട്ടി, കഴുതയ്ക്കു കടിഞ്ഞാണ്‍, മൂഢന്മാരുടെ മുതുകിനു വടി.

⁴നീയും മൂഢനെപ്പോലെ ആകാതിരിക്കേണ്ടതിന് അവന്‍റെ ഭോഷത്തംപോലെ അവനോട് ഉത്തരം പറയരുത്.

⁵മൂഢനു താന്‍ ജ്ഞാനിയെന്നു തോന്നാതിരിക്കേണ്ടതിന് അവന്‍റെ ഭോഷത്തത്തിന് ഒത്തവണ്ണം അവനോട് ഉത്തരം പറക.

⁶മൂഢന്‍റെ കൈവശം വര്‍ത്തമാനം അയയ്ക്കുന്നവന്‍ സ്വന്തകാൽ മുറിച്ചുകളകയും അന്യായം കുടിക്കയും ചെയ്യുന്നു.

⁷മൂഢന്മാരുടെ വായിലെ സദൃശവാക്യം മുടന്തന്‍റെ കാൽ ഞാന്നുകിടക്കുന്നതു പോലെ

⁸മൂഢനു ബഹുമാനം കൊടുക്കുന്നതു കവിണയിൽ കല്ലു കെട്ടി മുറുക്കുന്നതുപോലെ.

⁹മൂഢന്മാരുടെ വായിലെ സദൃശവാക്യം മത്തന്‍റെ കൈയിലെ മുള്ളുപോലെ.

¹⁰എല്ലാവരെയും മുറിവേല്പിക്കുന്ന വില്ലാളിയും മൂഢനെ കൂലിക്കു നിര്‍ത്തുന്നവനും കണ്ടവരെ കൂലിക്കു നിര്‍ത്തുന്നവനും ഒരുപോലെ.

¹¹നായ് ഛര്‍ദിച്ചതിലേക്കു വീണ്ടും തിരിയുന്നതും മൂഢന്‍ തന്‍റെ ഭോഷത്തം ആവര്‍ത്തിക്കുന്നതും ഒരുപോലെ.

¹²തനിക്കുതന്നെ ജ്ഞാനിയെന്നു തോന്നുന്ന മനുഷ്യനെ നീ കാണുന്നുവോ? അവനെക്കുറിച്ചുള്ളതിനെക്കാളും മൂഢനെക്കുറിച്ച് അധികം പ്രത്യാശയുണ്ട്.

¹³വഴിയിൽ കേസരി ഉണ്ട്, തെരുക്കളിൽ സിംഹം ഉണ്ട് എന്നിങ്ങനെ മടിയന്‍ പറയുന്നു.

¹⁴കതക് ചുഴിക്കുറ്റിയിൽ എന്നപോലെ മടിയന്‍ തന്‍റെ കിടക്കയിൽ തിരിയുന്നു.

¹⁵മടിയന്‍ തന്‍റെ കൈ തളികയിൽ പൂത്തുന്നു; വായിലേക്കു തിരികെ കൊണ്ടുവരുന്നത് അവനു പ്രയാസം.

¹⁶ബുദ്ധിയോടെ പ്രതിവാദിപ്പാന്‍ പ്രാപ്തിയുള്ള ഏഴു പേരിലും താന്‍ ജ്ഞാനി എന്നു മടിയനു തോന്നുന്നു.

¹⁷തന്നെ സംബന്ധിക്കാത്ത വഴക്കിൽ ഇടപെടുന്നവന്‍ വഴിയെ പോകുന്ന നായുടെ ചെവിക്കു പിടിക്കുന്നവനെപ്പോലെ.

¹⁸കൂട്ടുകാരനെ വഞ്ചിച്ചിട്ട് അതു കളി എന്നു പറയുന്ന മനുഷ്യന്‍

¹⁹തീക്കൊള്ളികളും അമ്പുകളും മരണവും എറിയുന്ന ഭ്രാന്തനെപ്പോലെയാകുന്നു.

²⁰വിറക് ഇല്ലാഞ്ഞാൽ തീ കെട്ടുപോകും; നുണയന്‍ ഇല്ലാഞ്ഞാൽ വഴക്കും ഇല്ലാതെയാകും.

²¹കരി കനലിനും വിറകു തീക്കും എന്നപോലെ വഴക്കുകാരന്‍ കലഹം ജ്വലിക്കുന്നതിനു കാരണം.

²²ഏഷണിക്കാരന്‍റെ വാക്ക് സ്വാദുഭോജനംപോലെ; അതു വയറ്റിന്‍റെ അറകളിലേക്കു ചെല്ലുന്നു.

²³സ്നേഹം ജ്വലിക്കുന്ന അധരവും ദുഷ്ടഹൃദയവും വെള്ളിക്കീടം പൊതിഞ്ഞ മണ്‍കുടംപോലെയാകുന്നു.

²⁴പകയ്ക്കുന്നവന്‍ അധരംകൊണ്ടു വേഷം ധരിക്കുന്നു; ഉള്ളിലോ അവന്‍ ചതിവ് സംഗ്രഹിച്ചു വയ്ക്കുന്നു.

²⁵അവന്‍ ഇമ്പമായി സംസാരിക്കുമ്പോള്‍ അവനെ വിശ്വസിക്കരുത്; അവന്‍റെ ഹൃദയത്തിൽ ഏഴു വെറുപ്പ് ഉണ്ട്.

²⁶അവന്‍റെ പക കപടംകൊണ്ടു മറച്ചുവച്ചാലും അവന്‍റെ ദുഷ്ടത സഭയുടെ മുമ്പിൽ വെളിപ്പെട്ടുവരും.

²⁷കുഴി കുഴിക്കുന്നവന്‍ അതിൽ വീഴും; കല്ല് ഉരുട്ടുന്നവന്‍റെമേൽ അതു തിരിഞ്ഞുരുളും.

²⁸ഭോഷ്കു പറയുന്ന നാവ് അതിനാൽ തകര്‍ന്നവരെ ദ്വേഷിക്കുന്നു; മുഖസ്തുതി പറയുന്ന വായ് നാശം വരുത്തുന്നു.