സദൃശവാക്യങ്ങള്‍ 21

¹രാജാവിന്‍റെ ഹൃദയം യഹോവയുടെ കൈയിൽ നീര്‍ത്തോടുകണക്കെ ഇരിക്കുന്നു; തനിക്ക് ഇഷ്ടമുള്ളേടത്തേക്കൊക്കെയും അവന്‍ അതിനെ തിരിക്കുന്നു.

²മനുഷ്യന്‍റെ വഴിയൊക്കെയും അവനു ചൊവ്വായിത്തോന്നുന്നു; യഹോവയോ ഹൃദയങ്ങളെ തൂക്കിനോക്കുന്നു.

³നീതിയും ന്യായവും പ്രവര്‍ത്തിക്കുന്നത് യഹോവയ്ക്കു ഹനനയാഗത്തെക്കാള്‍ ഇഷ്ടം.

⁴ഗര്‍വമുള്ള കണ്ണും അഹങ്കാരഹൃദയവും ദുഷ്ടന്മാരുടെ ദീപവും പാപം തന്നെ.

⁵ഉത്സാഹിയുടെ വിചാരങ്ങള്‍ സമൃദ്ധിഹേതുകങ്ങള്‍ ആകുന്നു; ബദ്ധപ്പാടുകാരൊക്കെയും ബുദ്ധിമുട്ടിലേക്കത്രേ ബദ്ധപ്പെടുന്നത്.

⁶കള്ളനാവുകൊണ്ടു ധനം സമ്പാദിക്കുന്നത് പാറിപ്പോകുന്ന ആവി ആകുന്നു; അതിനെ അന്വേഷിക്കുന്നവര്‍ മരണത്തെ അന്വേഷിക്കുന്നു.

⁷ദുഷ്ടന്മാരുടെ സാഹസം അവര്‍ക്കു നാശഹേതുവാകുന്നു; ന്യായം ചെയ്യുവാന്‍ അവര്‍ക്കു മനസ്സില്ലല്ലോ.

⁸അകൃത്യഭാരം ചുമക്കുന്നവന്‍റെ വഴി വളഞ്ഞിരിക്കുന്നു; നിര്‍മ്മലന്‍റെ പ്രവൃത്തിയോ ചൊവ്വുള്ളതു തന്നെ.

⁹ശണ്ഠകൂടുന്ന സ്ത്രീയോടുകൂടെ പൊതുവീട്ടിൽ പാര്‍ക്കുന്നതിനെക്കാള്‍ മേല്പുരയുടെ ഒരു കോണിൽ പാര്‍ക്കുന്നതു നല്ലത്.

¹⁰ദുഷ്ടന്‍റെ മനസ്സ് ദോഷത്തെ ആഗ്രഹിക്കുന്നു; അവന് കൂട്ടുകാരനോടു ദയ തോന്നുന്നതുമില്ല.

¹¹പരിഹാസിയെ ശിക്ഷിച്ചാൽ അല്പബുദ്ധി ജ്ഞാനിയായിത്തീരും; ജ്ഞാനിയെ ഉപദേശിച്ചാൽ അവന്‍ പരിജ്ഞാനം പ്രാപിക്കും.

¹²നീതിമാനായവന്‍ ദുഷ്ടന്‍റെ ഭവനത്തിന്മേൽ ദൃഷ്‍ടി വയ്ക്കുന്നു; ദുഷ്ടന്മാരെ നാശത്തിലേക്കു മറിച്ചുകളയുന്നു.

¹³എളിയവന്‍റെ നിലവിളിക്കു ചെവിപൊത്തിക്കളയുന്നവന്‍ താനും വിളിച്ചപേക്ഷിക്കും; ഉത്തരം ലഭിക്കയില്ല.

¹⁴രഹസ്യത്തിൽ ചെയ്യുന്ന ദാനം കോപത്തെയും മടിയിൽ കൊണ്ടുവരുന്ന സമ്മാനം ഉഗ്രകോപത്തെയും ശമിപ്പിക്കുന്നു.

¹⁵ന്യായം പ്രവര്‍ത്തിക്കുന്നതു നീതിമാനു സന്തോഷവും ദുഷ്പ്രവൃത്തിക്കാര്‍ക്കു ഭയങ്കരവും ആകുന്നു.

¹⁶വിവേകമാര്‍ഗം വിട്ടു നടക്കുന്നവന്‍ മൃതന്മാരുടെ കൂട്ടത്തിൽ വിശ്രമിക്കും.

¹⁷ഉല്ലാസപ്രിയന്‍ ദരിദ്രനായിത്തീരും; വീഞ്ഞും തൈലവും പ്രിയപ്പെടുന്നവന്‍ ധനവാനാകയില്ല.

¹⁸ദുഷ്ടന്‍ നീതിമാനു മറുവിലയാകും; ദ്രോഹി നേരുള്ളവര്‍ക്കു പകരമായിത്തീരും.

¹⁹ശണ്ഠയും ദുശ്ശീലവുമുള്ള സ്ത്രീയോടുകൂടെ പാര്‍ക്കുന്നതിലും നിര്‍ജനപ്രദേശത്തു പോയി പാര്‍ക്കുന്നതു നല്ലത്.

²⁰ജ്ഞാനിയുടെ പാര്‍പ്പിടത്തിൽ വിലയേറിയ നിക്ഷേപവും തൈലവും ഉണ്ട്; മൂഢനോ അവയെ ദുര്‍വ്യയം ചെയ്തുകളയുന്നു.

²¹നീതിയും ദയയും പിന്തുടരുന്നവന്‍ ജീവനും നീതിയും മാനവും കണ്ടെത്തും.

²²ജ്ഞാനി വീരന്മാരുടെ പട്ടണത്തിൽ കയറുകയും അതിന്‍റെ ആശ്രയമായ കോട്ടയെ ഇടിച്ചുകളകയും ചെയ്യുന്നു.

²³വായും നാവും സൂക്ഷിക്കുന്നവന്‍ തന്‍റെ പ്രാണനെ കഷ്ടങ്ങളിൽനിന്നു സൂക്ഷിക്കുന്നു.

²⁴നിഗളവും ഗര്‍വവും ഉള്ളവനു പരിഹാസി എന്നു പേര്‍; അവന്‍ ഗര്‍വത്തിന്‍റെ അഹങ്കാരത്തോടെ പ്രവര്‍ത്തിക്കുന്നു.

²⁵മടിയന്‍റെ കൊതി അവനു മരണഹേതു; വേലചെയ്‍വാന്‍ അവന്‍റെ കൈകള്‍ മടിക്കുന്നുവല്ലോ.

²⁶ചിലര്‍ നിത്യം അത്യാഗ്രഹത്തോടെ ഇരിക്കുന്നു; നീതിമാനോ ലോഭിക്കാതെ കൊടുത്തുകൊണ്ടിരിക്കുന്നു.

²⁷ദുഷ്ടന്മാരുടെ ഹനനയാഗം വെറുപ്പാകുന്നു; അവന്‍ ദുരാന്തരത്തോടെ അത് അര്‍പ്പിച്ചാൽ എത്ര അധികം!

²⁸കള്ളസ്സാക്ഷി നശിച്ചുപോകും; ശ്രദ്ധിച്ചുകേള്‍ക്കുന്നവനോ എപ്പോഴും സംസാരിക്കാം.

²⁹ദുഷ്ടന്‍ മുഖധാര്‍ഷ്ട്യം കാണിക്കുന്നു; നേരുള്ളവനോ തന്‍റെ വഴി നന്നാക്കുന്നു.

³⁰യഹോവയ്ക്കെതിരേ ജ്ഞാനവുമില്ല, ബുദ്ധിയുമില്ല, ആലോചനയുമില്ല.

³¹കുതിരയെ യുദ്ധദിവസത്തേക്കു ചമയിക്കുന്നു; ജയമോ യഹോവയുടെ കൈവശത്തിലിരിക്കുന്നു.