गन्ती 32

¹रूबेन र गादका सन्‍तानका बथानका बथान गाईबस्‍तु थिए। तिनीहरूले याजेर र गिलाद गौचरनको लागि उपयुक्त रहेछन्‌ भनी देखे। ⓚ

²यसैले गाद र रूबेनका सन्‍तान मोशा, एलाजार पूजाहारी र समुदायका नायकहरूकहाँ आएर यसो भने,

³“अतारोत, दीबोन, याजेर, निम्रा, हेश्‍बोन, एलाले, सबाम, नेबो र बओन—

⁴जुन देशलाई परमप्रभुले इस्राएलीहरूका समुदायको सामु नष्‍ट गर्नुभएको थियो यी देश गौचरनको लागि उपयुक्त रहेछन्‌। हामीसँग गाईबस्‍तु पनि छन्‌।

⁵यदि हामीमाथि तपाईंको निगाह भए यी देश हाम्रो अधिकारमा दिनुहोस्‌। हामीलाई यर्दन पारि चाहिँ नलैजानुहोस्‌।”

⁶मोशाले गाद र रूबेनका सन्‍तानलाई भने, “तिमीहरूका दाजुभाइ उता लड़ाइँमा जाँदा तिमीहरूचाहिँ यता ढुक्‍कै बस्‍छौ?

⁷परमप्रभुले दिनुभएको पारिपट्टिको देशतिर जान इस्राएलीहरूका चित्त तिमीहरू किन खलबलाइदिन्‍छौ?

⁸कादेश-बर्नेबाट मैले तिमीहरूका बुबाहरूलाई यो देशको चेवा गर्न पठाउँदा तिमीहरूका बुबाहरूले यसै गरेका थिए। ⓛ

⁹जब तिनीहरू एश्‍कोलको बेँसीमा गएर यो देश देखे, तब परमप्रभुले तिनीहरूलाई दिनुभएको देशमा नजाऊन्‌ भनी तिनीहरूले इस्राएलीहरूका चित्त खलबल पारिदिएका थिए।

¹⁰त्‍यस दिन परमप्रभु क्रोधित हुनुभयो, र यसो भनेर शपथ खानुभएको थियो: ⓜ

¹¹‘मैले अब्राहाम, इसहाक र याकूबसित शपथ खाएर प्रतिज्ञा गरेको देशमा मिश्रबाट आएका बीस वर्ष र उँभोका कोही पनि पस्‍न पाउनेछैन, किनभने तिनीहरूले पूर्ण रूपले मलाई पछ्याएनन्‌।

¹²कनज्‍जी यपुन्‍नेको छोरो कालेब र नूनको छोरो यहोशू मात्र पस्‍न पाउनेछन्, किनभने यिनीहरूले चाहिँ सम्‍पूर्ण रूपले परमप्रभुलाई पछ्याए’।

¹³इस्राएलीहरूसँग परमप्रभु क्रोधित हुनुभयो, र परमप्रभुको दृष्‍टिमा दुष्‍टता गर्ने पुस्‍ताका जम्‍मै नष्‍ट नहोउञ्‍जेल चालीस वर्षसम्‍म उहाँले तिनीहरूलाई उजाड़-स्‍थानमा यताउता डुलाउनुभयो।

¹⁴“ए पापिष्‍ठका सन्‍तान! इस्राएलतर्फ परमप्रभुको अझ धेरै भयानक क्रोध फेरि जगाउनलाई तिमीहरू उठेका छौ।

¹⁵तिमीहरूले उहाँलाई पछ्याउन इन्‍कार गर्‍यौ भने, उहाँले यी सारा मानिसहरूलाई फेरि उजाड़-स्‍थानमै त्‍याग्‍नुहुनेछ र तिनीहरूका विनाशको कारण तिमीहरू बन्‍नेछौ।”

¹⁶तब तिनीहरू मोशाको नजिक आएर भने, “हामी आफ्‍ना भेड़ाहरूका निम्‍ति खोर अनि आफ्‍ना स्‍त्री र बालबच्‍चाका निम्‍ति सहरहरू यहाँ बनाउन चाहन्‍छौं,

¹⁷तर हामी आफैचाहिँ इस्राएलीहरूलाई तिनीहरूका ठाउँमा नपुर्‍याउञ्‍जेल तिनीहरूका अगि लागेर सशस्‍त्र जान तयार छौं। यसै बीचमा हाम्रा स्‍त्री र बालबच्‍चाहरूचाहिँ यस मुलुकका मानिसहरूबाट ती सहरहरूका पर्खालभित्र सुरक्षित रहनेछन्‌।

¹⁸इस्राएलको हरेक मानिसले आफ्‍नो अधिकारको हिस्‍सा नपाउञ्‍जेल हामी घर फर्कनेछैनौं।

¹⁹यर्दन पारिपट्टि र त्‍यसदेखि उता तिनीहरूसित हामीहरू हिस्‍सा लिनेछैनौं, किनकि हाम्रो अधिकारको हिस्‍सा यर्दन वारि पूर्वपट्टि नै परेको छ।”

²⁰तब मोशाले तिनीहरूलाई भने, “ठीकै छ। यदि परमप्रभुको सामुन्‍ने तिमीहरू सशस्‍त्र लड़ाइँमा जान्‍छौ,

²¹अनि यदि परमप्रभुले आफ्‍ना शत्रुहरूलाई धपाएर देश परास्‍त नगरुञ्‍जेल तिमीहरू परमप्रभुको अगि सशस्‍त्र यर्दन पारि गयौ भने,

²²जब परमप्रभुको सामुन्‍ने त्‍यो देश वशमा हुन्‍छ, तब तिमीहरू फर्कन सक्‍छौ। अनि परमप्रभु र इस्राएलतर्फ तिमीहरूको कर्तव्‍यबाट तिमीहरू मुक्त हुनेछौ। तब यो मुलुक परमप्रभुको सामु तिमीहरूको अधिकारमा आउनेछ।

²³“तर तिमीहरूले यसो गरेनौ भने, तिमीहरूले परमप्रभुको सामु पाप गर्नेछौ, र तिमीहरूको पापले अवश्‍य तिमीहरूलाई फेला पार्नेछ।

²⁴तिमीहरूका स्‍त्री र बालबच्‍चाका निम्‍ति सहरहरू र भेड़ाबाख्राका निम्‍ति खोरहरू बनाओ, तर तिमीहरूले गरेका प्रतिज्ञा पनि पूरा गर।”

²⁵तब गाद र रूबेनका सन्‍तानले मोशालाई भने, “हजूरले आज्ञा गर्नुभएअनुसार हामीहरू गर्नेछौं।

²⁶हाम्रा बालकहरू, पत्‍नीहरू, भेड़ाबाख्रा र गाई-गोरु सबै यहीँ गिलादका सहरहरूमा रहनेछन्‌।

²⁷तर हजूरका दासहरू तपाईंको आज्ञाअनुसार परमप्रभुको सामु लड़ाइँ गर्न सशस्‍त्र पारि जानेछौं।”

²⁸तब मोशाले तिनीहरूका विषयमा एलाजार पूजाहारी, नूनका छोरा यहोशू र इस्राएलीहरूका कुलका परिवारका मुखियाहरूलाई आज्ञा दिए। ⓝ

²⁹मोशाले तिनीहरूलाई यसो भने, “गाद र रूबेनका सन्‍तान तिमीहरूका साथमा परमप्रभुको सामु लड़ाइँमा सशस्‍त्र यर्दन पारि गए भने, जब देश तिमीहरूको कब्जामा आउनेछ तब तिमीहरूले गिलाद देश तिनीहरूको अधिकारमा दिनू।

³⁰तर तिनीहरू अस्‍त्र उठाएर तिमीहरूका साथमा पारि जान मानेनन्‌ भने, तिनीहरूले तिमीहरूसँग कनान देशमै अधिकारको हिस्‍सा पाउनेछन्‌।”

³¹गाद र रूबेनका सन्‍तानले यसो भने, “परमप्रभुले हामीलाई जे भन्‍नुभएको छ हामी गर्नेछौं।

³²हामीहरू हातहतियार भिरेर परमप्रभुको सामु पारि कनान देशमा जानेछौं, तर हाम्रो अधिकारको भाग हामीलाई यर्दन वारि नै होस्‌।”

³³तब मोशाले गाद र रूबेनका सन्‍तान र योसेफका छोरा मनश्‍शेको आधा कुललाई एमोरीहरूका राजा सीहोनको राज्‍य र बाशानका राजा ओगको राज्‍य, उनीहरूका सिमानाभित्र पर्ने सहरहरूसमेत— सम्‍पूर्ण देश दिए।

³⁴तब गादका सन्‍तानले दीबोन, अतारोत, अरोएर,

³⁵अत्रोत-शोपान, याजेर योगबहा,

³⁶बेथ-निम्रा, बेथ-हारान— यी पर्खालले घेरेका सहरहरू बनाए, र भेड़ाबाख्राका निम्‍ति खोरहरू बनाए।

³⁷रूबेनका सन्‍तानले हेश्‍बोन, एलाले र किर्यातैम,

³⁸नेबो, बाल-मोन (यिनीहरूका नाउँ बद्‌लिएका छन्‌), र सिब्‍मा बनाए, र तिनीहरूले आफूले बनाएका सहरहरूका नाउँ राखे।

³⁹मनश्‍शेका छोरा माकीरका सन्‍तान गिलादमा गए, र त्‍यो कब्‍जा गरेर त्‍यहाँ भएका एमोरीहरूलाई निकालिदिए।

⁴⁰यसकारण मोशाले मनश्‍शेका छोरा माकीरका सन्‍तानलाई गिलाद दिइहाले, र तिनीहरूले त्‍यहीँ नै बसोबास गरे।

⁴¹मनश्‍शेका सन्‍तान याईर गएर त्‍यसका बस्‍तीहरू कब्‍जा गरे, र ती सबको नाउँ हब्‍बात-याईर राखे।

⁴²अनि नोबहचाहिँ गएर केनात र त्‍यसका बस्‍तीहरू कब्‍जा गरे, र ती सबलाई आफ्‍नै नाउँ नोबह दिए।