गन्ती 28

¹परमप्रभुले मोशालाई भन्‍नुभयो, ⓐ

²“इस्राएलीहरूलाई यसो भनेर आज्ञा गर्‌: ‘आगोद्वारा चढ़ाइने मलाई मन पर्ने मीठो बास्‍ना हुने मेरा बलिहरूको भोजन तोकिएको समयमा चढ़ाउन तिमीहरूले याद राख्‍नू’।

³तैंले तिनीहरूलाई यसो भन्‌: ‘तिमीहरूले परमप्रभुको निम्‍ति आगोद्वारा चढ़ाउने बलि यही हो: दुई वटा एक वर्षे निष्‍खोट थुमाहरू नित्‍यको होमबलिको निम्‍ति दिनहुँ चढ़ाउनू,

⁴एउटा बिहान र अर्को बेलुकी।

⁵अन्‍नबलिको निम्‍ति एक लिटर कुटेको भद्राक्षको तेलमा मुछेको आधा पाथी मसिनो पीठो पनि सँगै चढ़ाउनू।

⁶यो निरन्‍तरको होमबलि आगोद्वारा चढ़ाइएको परमप्रभुको निम्‍ति मीठो बास्‍ना हुनलाई सीनै पर्वतमा ठहराइएको थियो।

⁷त्‍यसको अर्घ-बलिचाहिँ एउटा थुमाको निम्‍ति एक लिटर मद्य होस्‌। त्‍यो अर्घ-बलि पवित्रस्‍थानमा परमप्रभुको निम्‍ति चढ़ाउनू।

⁸दोस्रो थुमा बेलुकी चढ़ाउनू। बिहानजस्‍तो गरी अन्‍नबलि र त्‍यसको अर्घ-बलि चढ़ाउनू। यो परमप्रभुलाई मन पर्ने मीठो बास्‍ना, आगोद्वारा चढ़ाइएको बलि हो।

⁹“‘शबाथमा दुई वटा एक वर्षे निष्‍खोट थुमा, तेलमा मुछेको एक पाथी मसिनो पीठो अन्‍नबलिको निम्‍ति र त्‍यसको अर्घ-बलिसमेत चढ़ाउनू।

¹⁰नित्‍यको होमबलि र त्‍यसको अर्घ-बलिबाहेक हरेक शबाथको होमबलि यही हो।

¹¹“‘हरेक महिनाको पहिलो दिनमा तिमीहरूले परमप्रभुको निम्‍ति होमबलिको लागि दुई वटा बाछा, एउटा भेड़ा र सात वटा एक वर्षे थुमा चढ़ाउनू। यी सब निष्‍खोट हुनुपर्छ।

¹²हरेक बाछासित तेलमा मुछेको डेढ़ पाथी मसिनो पीठो अन्‍नबलिको निम्‍ति, भेड़ासित तेलमा मुछेको एक पाथी मसिनो पीठो अन्‍नबलिको निम्‍ति,

¹³र हरेक थुमासित अन्‍नबलिको निम्‍ति तेलमा मुछेको आधा पाथी मसिनो पीठो चढ़ाउनू। यो परमप्रभुको निम्‍ति मीठो बास्‍ना, आगोद्वारा चढ़ाइएको बलि, अर्थात्‌ होमबलिको लागि हो।

¹⁴तिनका अर्घ-बलि, एउटा बाछाको निम्‍ति दुई लिटर दाखमद्य, भेड़ाको निम्‍ति डेढ़ लिटर दाखमद्य, र हरेक थुमाको निम्‍ति एक लिटर दाखमद्य होस्‌। वर्षभरिका सबै महिनाहरूमा हरेक औंसीमा चढ़ाउने होमबलि यही हो।

¹⁵पापबलिको लागि परमप्रभुको निम्‍ति एउटा बोकाचाहिँ नित्‍यको होमबलि र अर्घ-बलिबाहेक चढ़ाउनू।

¹⁶“‘पहिलो महिनाको चौधौँ दिनमा परमप्रभुको निस्‍तार-चाड़ मनाउनुपर्छ। ⓑ ⓒ

¹⁷त्‍यस महिनाको पन्‍ध्रौँ दिनमा एउटा उत्‍सव होस्‌। त्‍यस उत्‍सवमा सात दिनसम्‍म अखमिरी रोटी खानुपर्छ। ⓓ

¹⁸पहिलो दिनचाहिँ पवित्र सभा होस्‌। त्‍यस दिनमा तिमीहरूले कुनै दैनिक काम नगर्नू।

¹⁹परमप्रभुको निम्‍ति आगोद्वारा चढ़ाइने बलिको लागि दुई वटा बाछा, एउटा भेड़ा र सात वटा एक वर्षे थुमा होमबलिको रूपमा चढ़ाउनू। यी सब निष्‍खोट हुनुपर्छ।

²⁰तिनका अन्‍नबलिको निम्‍ति हरेक बाछासित तेलमा मुछेको डेढ़ पाथी मसिनो पीठो, भेड़ासित एक पाथी,

²¹र सात वटा थुमामा हरेक थुमासित आधा पाथी चढ़ाउनू।

²²साथै तिमीहरूको प्रायश्‍चित गर्नलाई पापबलिको निम्‍ति एउटा बोका पनि चढ़ाउनू।

²³योचाहिँ बिहानको नित्‍यको होमबलिबाहेक चढ़ाउनू।

²⁴यही किसिमले तिमीहरूले सात दिनसम्‍मै परमप्रभुको निम्‍ति मीठो बास्‍ना हुनलाई आगोद्वारा चढ़ाइने बलिहरूको भोजन प्रतिदिन चढ़ाउनू। योचाहिँ नित्‍यको होमबलि र त्‍यसको अर्घ-बलिबाहेक चढ़ाउनू।

²⁵सातौँ दिनमा तिमीहरूको एउटा पवित्र सभा होस्, र तिमीहरूले त्‍यस दिन कुनै दैनिक काम नगर्नू।

²⁶“‘अगौटे फलको दिनमा तिमीहरूले परमप्रभुको निम्‍ति साताहरूको चाड़मा नयाँ अन्‍नको बलि चढ़ाउँदा तिमीहरूको एउटा पवित्र सभा होस्‌। त्‍यस दिन तिमीहरूले कुनै दैनिक काम नगर्नू। ⓔ

²⁷तिमीहरूले परमप्रभुको निम्‍ति मीठो बास्‍ना हुनलाई बलिको लागि दुई वटा बाछा, एउटा भेड़ा र सात वटा एक वर्षे थुमा

²⁸तिनका अन्‍नबलिको निम्‍ति हरेक बाछासित तेलमा मुछेको डेढ़ पाथी मसिनो पीठो, भेड़ासित एक पाथी,

²⁹र सात वटा थुमामा हरेक थुमासित आधा पाथी चढ़ाउनू।

³⁰साथै तिमीहरूको प्रायश्‍चित गर्नलाई एउटा बोका पनि चढ़ाउनू।

³¹नित्‍यको होमबलि र त्‍यसको अन्‍नबलिबाहेक तिमीहरूले तिनका अर्घ-बलि चढ़ाउनू। ती पशुहरूचाहिँ निष्‍खोट हुनुपर्छ’।”