गन्ती 15

¹परमप्रभुले मोशालाई भन्‍नुभयो,

²“इस्राएलीहरूलाई यसो भन्‌: ‘मैले तिमीहरूलाई वासको निम्‍ति दिने देशमा जब तिमीहरू पुग्‍छौ,

³र परमप्रभुलाई गाईबस्‍तु कि भेड़ाबाख्राबाट तिमीहरूले आगोद्वारा होमबलि वा बाख्रा बलिदान, भाकलको बलि वा राजीखुशीको बलि, अथवा तोकिएको चाड़को बलि परमप्रभुलाई मन पर्ने मीठो बास्‍ना स्‍वरूप चढ़ाउँछौ,

⁴तब बलि चढ़ाउनेले एक लिटर तेलमा मुछेको आधा पाथी मसिनो पीठोको अन्‍नबलि परमप्रभुलाई चढ़ाओस्‌।

⁵बलिदान वा होमबलिको प्रत्‍येक थुमाको साथमा अर्घ-बलिको निम्‍ति एक लिटर दाखमद्य पनि तैंले तयार गर्नू।

⁶“‘भेड़ासँग चाहिँ अन्‍नबलिको निम्‍ति डेढ़ लिटर तेलमा मुछेको आधा पाथी मसिनो पीठो,

⁷र अर्घ-बलिको निम्‍ति डेढ़ लिटर दाखमद्य तैंले तयार गर्नू। त्‍यो परमप्रभुको निम्‍ति मीठो बास्‍ना स्‍वरूप तैंले चढ़ाउनू।

⁸“‘भाकल पूरा गर्न अथवा मेलबलिको लागि तैंले होमबलि वा बलिदानको साँढ़े तयार पार्दा,

⁹त्‍यस साँढ़ेको साथ दुई लिटर तेलमा मुछेको डेढ़ पाथी मसिनो पीठो अन्‍नबलि स्‍वरूप पनि चढ़ाउनू।

¹⁰अनि अर्घ-बलिको निम्‍ति दुई लिटर दाखमद्य ल्‍याउनू। त्‍यो परमप्रभुको निम्‍ति मन पर्ने मीठो बास्‍ना, आगोद्वारा चढ़ाइएको बलि हुनेछ।

¹¹हरेक साँढ़े वा बोका, थुमा अथवा पाठाको निम्‍ति पनि तैंले यसै गर्नू।

¹²जति वटा तिमीहरूले चढ़ाउँछौ, प्रत्‍येकलाई त्‍यसै गर्नू।

¹³“‘स्‍वदेशीहरूले परमप्रभुको निम्‍ति मीठो बास्‍ना आउने बलि आगोद्वारा चढ़ाउँदा सबैले यही रीतिबमोजिम गरून्‌।

¹⁴तिमीहरूसित प्रवास गर्ने परदेशी अथवा आउने पुस्‍तामा तिमीहरूसँग बस्‍ने कुनै मानिसले परमप्रभुको निम्‍ति मीठो बास्‍ना आउने बलि आगोद्वारा चढ़ाउँदा त्‍यसले पनि तिमीहरूले जस्‍तै गरोस्‌।

¹⁵तिमीहरूका निम्‍ति र तिमीहरूसित प्रवास गर्ने परदेशीको निम्‍ति समुदायको एउटै नियम होस्‌। यो तिमीहरूका आउने पुस्‍तौँ-पुस्‍तौँसम्‍म अनन्‍तको विधि होस्‌। परदेशी पनि परमप्रभुको सामु तिमीहरूजस्‍तै होस्‌।

¹⁶तिमीहरू र तिमीहरूसँग प्रवास गर्ने परदेशीको निम्‍ति एउटै नियम र एउटै विधि होस्‌’।” ⓧ

¹⁷परमप्रभुले मोशालाई भन्‍नुभयो,

¹⁸“इस्राएलीहरूलाई भन्‌: ‘जब तिमीहरू मैले तिमीहरूलाई लैजाने देशमा पुग्‍छौ,

¹⁹तब तिमीहरूले त्‍यस देशको अन्‍न खाँदा परमप्रभुको निम्‍ति बलि चढ़ाउनू।

²⁰आफ्‍नो पहिलो पीठोको फुरौला तिमीहरूले खलाबाट ल्‍याएको बलिजस्‍तो चढ़ाउनू।

²¹तिमीहरूका आउने पुस्‍तौँसम्‍म तिमीहरूले पहिलो पीठोबाट परमप्रभुको निम्‍ति बलि चढ़ाउनू।

²²“‘तिमीहरूले भूल गरेर परमप्रभुले मोशालाई दिनुभएका यी सबै आज्ञाहरूमध्‍ये कुनै आज्ञा पालन गरेनौ,

²³अर्थात्‌ तिमीहरूका सारा पुस्‍तौँसम्‍म प्रथम दिनदेखि अहिलेसम्‍म परमप्रभुले मोशाद्वारा दिनुभएका आज्ञाहरूमध्‍ये कुनै आज्ञा पालन गरेनौ भने,

²⁴र समुदायले थाहा नपाई त्‍यो काम अजानमा गरेको रहेछ भने, सारा समुदायले परमप्रभुलाई मन पर्ने मीठो बास्‍ना स्‍वरूप होमबलिको निम्‍ति एउटा बाछो, त्‍यसको अन्‍नबलि र अर्घ-बलिको साथमा विधिअनुसार चढ़ाओस्, र साथै पापबलिको निम्‍ति एउटा बोका पनि चढ़ाओस्‌।

²⁵पूजाहारीले इस्राएलीहरूका जम्‍मै समुदायको निम्‍ति प्रायश्‍चित गरून्, र तिनीहरूलाई क्षमा हुनेछ, किनभने त्‍यो अजानमा गरिएको थियो, र तिनीहरूले आफ्‍नो अधर्मको निम्‍ति परमप्रभुलाई आगोद्वारा चढ़ाइएको बलि र पापबलि परमप्रभुको सामुन्‍ने ल्‍याएका छन्‌।

²⁶यसरी इस्राएलीहरूका सारा समुदाय र तिनीहरूका बीचमा बस्‍ने प्रवासीलाई पनि क्षमा गरिनेछ, किनभने सबै मानिसहरू अजानमा नै यस अधर्ममा परेका थिए।

²⁷“‘यदि कुनै एक जना मानिसले अजानमा पाप गर्‍यो भने, त्‍यसले एउटा एक वर्षे बाख्राकी पाठी चढ़ाओस्‌। ⓨ

²⁸अजानमा पाप गर्ने त्‍यस व्‍यक्तिको प्रायश्‍चितको निम्‍ति पूजाहारीले परमप्रभुको सामु प्रायश्‍चित गरून्, र त्‍यसलाई क्षमा हुनेछ।

²⁹अजानमा पाप गर्ने इस्राएली वा तिमीहरूसँग बस्‍ने प्रवासीको एउटै नियम होस्‌।

³⁰“‘तर स्‍वदेशी वा परदेशी कुनै व्‍यक्तिले अटेरीसाथ पाप गर्‍यो भने, त्‍यसले निन्‍दा गर्छ, र त्‍यो व्‍यक्ति आफ्‍ना मानिसहरूबाट बहिष्‍कृत होस्‌।

³¹किनभने त्‍यसले परमप्रभुको वचनलाई तिरस्‍कार गरेको छ, र उहाँका आज्ञा भङ्ग गरेको छ। त्‍यो व्‍यक्ति बिलकुलै बहिष्‍कार गरिओस्‌। त्‍यसले आफ्‍नो अधर्मको फल भोगोस्‌’।”

³²इस्राएलीहरू उजाड़-स्‍थानमा हुँदा तिनीहरूले एक जना मानिसलाई शबाथ-दिनमा दाउरा बटुलिरहेको फेला पारे।

³³दाउरा बटुल्‍नेलाई तिनीहरूले मोशा, हारून र सारा समुदायकहाँ ल्‍याए।

³⁴त्‍यसलाई गर्नुपर्ने कारवाही थाहा नभएकोले तिनीहरूले त्‍यसलाई थुनामा राखे।

³⁵तब परमप्रभुले मोशालाई भन्‍नुभयो, “त्‍यो मानिस मारिनैपर्छ। सारा समुदायले त्‍यसलाई छाउनीबाहिर ढुङ्गा हानेर मारून्‌।”

³⁶अनि परमप्रभुले मोशालाई आज्ञा गर्नुभएझैँ सारा समुदायले त्‍यसलाई छाउनीबाहिर ल्‍याए, र त्‍यसलाई मारे।

³⁷फेरि परमप्रभुले मोशालाई यसो भन्‍नुभयो,

³⁸“इस्राएलीहरूलाई भन्‌: ‘तिनीहरूले आफ्‍ना सबै पुस्‍तौँभरि लुगाको किनारमा नीलो फित्ता लगाएको झुम्‍का हालून्‌। ⓩ

³⁹त्‍यस झुम्‍कालाई हेर्दा तिमीहरूलाई परमप्रभुका आज्ञाहरूको सम्‍झना होस्‌ कि तिमीहरूले ती आज्ञाहरू पालन गर, र आफ्‍ना मन र आँखाका लालसामा लागेर पथभ्रष्‍ट नहोओ।

⁴⁰तब तिमीहरूले मेरा सबै आज्ञा मान्‍न सम्‍झना राखेर आफ्‍ना परमेश्‍वरको निम्‍ति पवित्र हुनेछौ।

⁴¹तिमीहरूका परमेश्‍वर हुनलाई तिमीहरूलाई मिश्रबाट ल्‍याउने परमप्रभु तिमीहरूका परमेश्‍वर मै हुँ। परमप्रभु तिमीहरूका परमेश्‍वर म नै हुँ’।”