മര്‍ക്കൊസ് 3

¹അവന്‍ പിന്നെയും പള്ളിയില്‍ ചെന്നു: അവിടെ വരണ്ട കൈയുള്ള ഒരു മനുഷ്യന്‍ ഉണ്ടായിരുന്നു.

²അവര്‍ അവനെ കുറ്റം ചുമത്തേണ്ടതിനു ശബ്ബത്തില്‍ അവനെ സൗഖ്യമാക്കുമോ എന്നു നോക്കിക്കൊണ്ടിരുന്നു.

³വരണ്ട കൈയുള്ള മനുഷ്യനോട് അവന്‍: നടുവില്‍ എഴുന്നേറ്റുനില്ക്ക എന്നു പറഞ്ഞു.

⁴പിന്നെ അവരോട്: ശബ്ബത്തില്‍ നന്മ ചെയ്കയോ, തിന്മ ചെയ്കയോ, ജീവനെ രക്ഷിക്കയോ, കൊല്ലുകയോ, ഏതു വിഹിതം എന്നു ചോദിച്ചു. അവരോ മിണ്ടാതിരുന്നു.

⁵അവരുടെ ഹൃദയകാഠിന്യം നിമിത്തം അവന്‍ ദുഃഖിച്ചുകൊണ്ടു കോപത്തോടെ അവരെ ചുറ്റും നോക്കി, ആ മനുഷ്യനോട്: കൈ നീട്ടുക എന്നു പറഞ്ഞു; അവന്‍ നീട്ടി, അവന്‍റെ കൈ സൗഖ്യമായി.

⁶ഉടനെ പരീശന്മാര്‍ പുറപ്പെട്ട്, അവനെ നശിപ്പിക്കേണ്ടതിനു ഹെരോദ്യരുമായി ആലോചന കഴിച്ചു.

⁷യേശു ശിഷ്യന്മാരുമായി കടല്ക്കരയ്ക്കു വാങ്ങിപ്പോയി; ഗലീലയില്‍നിന്നു വലിയൊരു പുരുഷാരം അവനെ അനുഗമിച്ചു;

⁸യെഹൂദ്യയില്‍നിന്നും യെരൂശലേമില്‍നിന്നും എദോമില്‍നിന്നും യോര്‍ദ്ദാനക്കരെനിന്നും സോരിന്‍റെയും സീദോന്‍റെയും ചുറ്റുപാടില്‍നിന്നും വലിയൊരു കൂട്ടം അവന്‍ ചെയ്തത് ഒക്കെയും കേട്ടിട്ട് അവന്‍റെ അടുക്കല്‍ വന്നു.

⁹പുരുഷാരം തന്നെ ഞെരുക്കാതിരിക്കേണ്ടതിന് അവരുടെ നിമിത്തം ഒരു ചെറുപടകു തനിക്ക് ഒരുക്കി നിറുത്തുവാന്‍ അവന്‍ ശിഷ്യന്മാരോടു പറഞ്ഞു.

¹⁰അവന്‍ അനേകരെ സൗഖ്യമാക്കുകയാല്‍ ബാധകള്‍ ഉള്ളവര്‍ ഒക്കെയും അവനെ തൊടേണ്ടതിനു തിക്കിത്തിരക്കി വന്നു.

¹¹അശുദ്ധാത്മാക്കളും അവനെ കാണുമ്പോള്‍ ഒക്കെയും അവന്‍റെ മുമ്പില്‍ വീണു: നീ ദൈവപുത്രന്‍ എന്നു നിലവിളിച്ചു പറയും.

¹²തന്നെ പ്രസിദ്ധമാക്കാതിരിക്കേണ്ടതിന് അവന്‍ അവരെ വളരെ ശാസിച്ചുപോന്നു.

¹³പിന്നെ അവന്‍ മലയില്‍ കയറി തനിക്കു ബോധിച്ചവരെ അടുക്കല്‍ വിളിച്ചു; അവര്‍ അവന്‍റെ അരികെ വന്നു.

¹⁴അവന്‍ തന്നോടുകൂടെ ഇരിപ്പാനും പ്രസംഗിക്കേണ്ടതിന് അയപ്പാനും

¹⁵ഭൂതങ്ങളെ പുറത്താക്കേണ്ടതിന് അധികാരം ഉണ്ടാകുവാനും പന്തിരുവരെ നിയമിച്ചു:

¹⁶ശിമോനു പത്രൊസ് എന്നു പേരിട്ടു;

¹⁷സെബെദിയുടെ മകനായ യാക്കോബ്, യാക്കോബിന്‍റെ സഹോദരനായ യോഹന്നാന്‍: ഇവര്‍ക്ക് ഇടിമക്കള്‍ എന്നര്‍ഥമുള്ള ബൊവനേര്‍ഗെരുസ് എന്നു പേരിട്ടു-

¹⁸അന്ത്രെയാസ്, ഫീലിപ്പൊസ്, ബര്‍ത്തൊലോമായി, മത്തായി, തോമാസ്, അല്ഫായിയുടെ മകനായ യാക്കോബ്, തദ്ദായി, കനാന്യനായ ശിമോന്‍,

¹⁹തന്നെ കാണിച്ചു കൊടുത്ത ഈസ്കര്യോത്ത് യൂദാ എന്നിവരെ തന്നേ.

²⁰അവന്‍ വീട്ടില്‍ വന്നു; അവര്‍ക്കു ഭക്ഷണം കഴിപ്പാന്‍പോലും വഹിയാതവണ്ണം പുരുഷാരം പിന്നെയും തിങ്ങിക്കൂടിവന്നു.

²¹അവന്‍റെ ചാര്‍ച്ചക്കാര്‍ അതു കേട്ട്, അവനു ബുദ്ധിഭ്രമം ഉണ്ട് എന്നു പറഞ്ഞ് അവനെ പിടിപ്പാന്‍ വന്നു.

²²യെരൂശലേമില്‍നിന്നു വന്ന ശാസ്ത്രിമാരും: അവനു ബെയെത്സെബൂല്‍ ഉണ്ട്, ഭൂതങ്ങളുടെ തലവനെക്കൊണ്ട് അവന്‍ ഭൂതങ്ങളെ പുറത്താക്കുന്നു എന്നു പറഞ്ഞു.

²³അവന്‍ അവരെ അടുക്കെ വിളിച്ച് ഉപ മകളാല്‍ അവരോടു പറഞ്ഞത്: സാത്താനു സാത്താനെ എങ്ങനെ പുറത്താക്കുവാന്‍ കഴിയും?

²⁴ഒരു രാജ്യം തന്നില്‍ത്തന്നെ ഛിദ്രിച്ചു എങ്കില്‍ ആ രാജ്യത്തിനു നിലനില്പാന്‍ കഴികയില്ല.

²⁵ഒരു വീടു തന്നില്‍ത്തന്നെ ഛിദ്രിച്ചു എങ്കില്‍ ആ വീട്ടിനു നിലനില്പാന്‍ കഴികയില്ല.

²⁶സാത്താന്‍ തന്നോടുതന്നെ എതിര്‍ത്തു ഛിദ്രിച്ചു എങ്കില്‍ അവനു നിലനില്പാന്‍ കഴിവില്ല; അവന്‍റെ അവസാനം വന്നു.

²⁷ബലവാനെ പിടിച്ചു കെട്ടീട്ടല്ലാതെ അവന്‍റെ വീട്ടില്‍ കടന്ന് അവന്‍റെ കോപ്പു കവര്‍ന്നുകളവാന്‍ ആര്‍ക്കും കഴികയില്ല; പിടിച്ചു കെട്ടിയാല്‍ പിന്നെ അവന്‍റെ വീടു കവര്‍ച്ച ചെയ്യാം.

²⁸മനുഷ്യരോടു സകല പാപങ്ങളും അവര്‍ ദുഷിച്ചുപറയുന്ന സകല ദൂഷണങ്ങളും ക്ഷമിക്കും;

²⁹പരിശുദ്ധാത്മാവിന്‍റെ നേരേ ദൂഷണം പറയുന്നവനോ ഒരുനാളും ക്ഷമ കിട്ടാതെ നിത്യശിക്ഷയ്ക്കു യോഗ്യനാകും എന്നു ഞാന്‍ സത്യമായിട്ടു നിങ്ങളോടു പറയുന്നു.

³⁰അവന് ഒരു അശുദ്ധാത്മാവ് ഉണ്ട് എന്ന് അവര്‍ പറഞ്ഞിരുന്നു.

³¹അനന്തരം അവന്‍റെ അമ്മയും സഹോദരന്മാരും വന്നു പുറത്തു നിന്ന് അവനെ വിളിപ്പാന്‍ ആളയച്ചു.

³²പുരുഷാരം അവന്‍റെ ചുറ്റും ഇരുന്നിരുന്നു; അവര്‍ അവനോട്: നിന്‍റെ അമ്മയും സഹോദരന്മാരും പുറത്തുനിന്നു നിന്നെ അന്വേഷിക്കുന്നു എന്നു പറഞ്ഞു.

³³അവന്‍ അവരോട്: എന്‍റെ അമ്മയും സഹോദരന്മാരും ആര്‍ എന്നു പറഞ്ഞിട്ടു

³⁴ചുറ്റിലും ഇരിക്കുന്നവരെ നോക്കിക്കൊണ്ട്: എന്‍റെ അമ്മയും സഹോദരന്മാരും ഇതാ.

³⁵ദൈവത്തിന്‍റെ ഇഷ്ടം ചെയ്യുന്നവന്‍ തന്നെ എന്‍റെ സഹോദരനും സഹോദരിയും അമ്മയും ആകുന്നു എന്നു പറഞ്ഞു.