यूहन्‍ना 2

¹तेस्रो दिन गालीलको काना नगरमा एउटा विवाह थियो। येशूकी आमा त्‍यहाँ थिइन्‌।

²येशू र उहाँका चेलाहरू पनि विवाहमा निम्‍त्‍याइएका थिए।

³दाखमद्य सिद्धिएपछि येशूकी आमाले उहाँलाई भनिन्, “तिनीहरूसित दाखमद्य छैन।”

⁴येशूले तिनलाई भन्‍नुभयो, “हे नारी, मैले के गर्नुपर्छ मलाई नभन्‍नुहोस्‌। मेरो समय अझसम्‍म आएको छैन।”

⁵उहाँकी आमाले चाकरहरूलाई भनिन्, “उहाँले भन्‍नुभएबमोजिम तिमीहरूले गर।”

⁶अब यहूदीहरूको शुद्धि हुने प्रथाको निम्‍ति त्‍यहाँ प्राय: एक सय लिटर अटाउने ढुङ्गाका छ वटा घ्याम्‍पाहरू राखिएका थिए।

⁷येशूले तिनीहरूलाई भन्‍नुभयो, “घ्याम्‍पाहरू पानीले भर।” तिनीहरूले घ्याम्‍पाको मुखसम्‍मै पानी भरिदिए।

⁸उहाँले तिनीहरूलाई भन्‍नुभयो, “अलिकता उघाएर भोजका मुखियाकहाँ लैजाओ।” तिनीहरूले सो लगे।

⁹भोजका मुखियाले त्‍यो पानी चाखे, जो अब दाखमद्यमा परिणत भएको थियो। त्‍यो कहाँबाट आएको हो सो तिनलाई थाहा थिएन, तर पानी भर्ने चाकरहरूलाई भने थाहा थियो। तब भोजका मुखियाले दुलहालाई बोलाएर भने,

¹⁰“हरेक मानिसले पहिले असल दाखमद्य टक्र्याउँछ अनि मानिसहरूले निकै खाइसकेपछि मात्र कमसल दाखमद्य राखिदिन्‍छ। तिमीले त असल दाखमद्य अहिलेसम्‍म राखिछोड़ेछौ।”

¹¹उहाँका चिन्‍हहरूमध्‍ये यो पहिलो चिन्‍ह येशूले गालीलको कानामा गर्नुभयो। यसरी उहाँले आफ्‍नो महिमा प्रकट गर्नुभयो, अनि उहाँका चेलाहरूले उहाँमाथि विश्‍वास गरे।

¹²त्‍यसपछि उहाँ आफ्‍ना आमा, भाइहरू र चेलाहरूसँग कफर्नहुममा जानुभयो, र केही दिन त्‍यहाँ बस्‍नुभयो। ⓕ

¹³यहूदीहरूको निस्‍तार-चाड नजिकै थियो, र येशू यरूशलेममा जानुभयो। ⓖ

¹⁴उहाँले मन्‍दिरमा गोरु, भेड़ा र ढुकुर बेच्‍नेहरू र पैसा साट्‌नेहरूले किनबेच गरिरहेका भेट्टाउनुभयो।

¹⁵तब डोरीको एउटा कोर्रा बनाएर उहाँले मन्‍दिरबाट ती सबैलाई, तिनका भेड़ाहरू र गोरुहरूलाई समेत मन्‍दिरबाट बाहिर लघार्नुभयो, र पैसा साट्‌नेहरूको रेचकी घोप्‍ट्याएर तिनीहरूका टेबिल पल्‍टाइदिनुभयो।

¹⁶ढुकुर बेच्‍नेहरूलाई उहाँले भन्‍नुभयो, “यहाँबाट यी सब थोक लैजाओ। मेरा पिताको भवनलाई व्‍यापारको घर नतुल्‍याओ।”

¹⁷उहाँका चेलाहरूलाई धर्मशास्‍त्रमा लेखिएको यो कुरा याद भयो, “तपाईंका भवनको जोशले मलाई जलाउनेछ।” ⓗ

¹⁸यहूदीहरूले उहाँलाई भने, “तपाईं यी काम गर्नुहुन्‍छ, त यिनका निम्‍ति हामीलाई के चिन्‍ह देखाउनुहुन्‍छ?”

¹⁹येशूले तिनीहरूलाई जवाफ दिनुभयो, “यस मन्‍दिरलाई भत्‍काइदेओ, र म तीन दिनमा यसलाई खड़ा गर्नेछु।” ⓘ

²⁰तब यहूदीहरूले भने, “यस मन्‍दिरलाई निर्माण गर्न छयालीस वर्ष लाग्‍यो, र के तपाईं यसलाई तीन दिनमा खड़ा गर्न सक्‍नुहुन्‍छ र?”

²¹तर जुन मन्‍दिरको विषयमा उहाँ बोल्‍नुभएको थियो, त्‍यो उहाँको शरीर थियो।

²²जब उहाँ मृतकबाट उठाइनुभयो, तब येशूले भन्‍नुभएको यो कुरा चेलाहरूलाई स्‍मरण भयो, र तिनीहरूले धर्मशास्‍त्रमाथि र येशूले बोल्‍नुभएको वचनमाथि विश्‍वास गरे।

²³जब उहाँ निस्‍तार-चाड़का भोजको बेला यरूशलेममा हुनुहुन्‍थ्‍यो, तब उहाँले गर्नुभएका चिन्‍हहरू देखेर धेरैले उहाँको नाउँमा विश्‍वास गरे।

²⁴तर येशूले आफैलाई तिनीहरूका भरमा छोड्‌नुभएन,

²⁵किनकि मानिस के हो भनी उहाँ जान्‍नुहुन्‍थ्‍यो। उहाँलाई मानिसको विषयमा कसैले सिकाउनु आवश्‍यक थिएन, किनकि मानिसको हृदयमा के हुन्‍छ, सो उहाँ स्‍वयम्‌ जान्‍नुहुन्‍थ्‍यो।