പഴയ നിയമംMOV
1എഴുന്നേറ്റു പ്രകാശിക്ക; നിന്‍റെ പ്രകാശം വന്നിരിക്കുന്നു; യഹോവയുടെ തേജസ്സും നിന്‍റെമേൽ ഉദിച്ചിരിക്കുന്നു.
2അന്ധകാരം ഭൂമിയെയും കൂരിരുട്ടു ജാതികളെയും മൂടുന്നു; നിന്‍റെമേലോ യഹോവ ഉദിക്കും; അവന്‍റെ തേജസ്സും നിന്‍റെമേൽ പ്രത്യക്ഷമാകും.
3ജാതികള്‍ നിന്‍റെ പ്രകാശത്തിലേക്കും രാജാക്കന്മാര്‍ നിന്‍റെ ഉദയശോഭയിലേക്കും വരും.
4നീ തല പൊക്കി ചുറ്റും നോക്കുക; അവര്‍ എല്ലാവരും ഒന്നിച്ചുകൂടി നിന്‍റെ അടുക്കൽ വരുന്നു; നിന്‍റെ പുത്രന്മാര്‍ ദൂരത്തുനിന്നു വരും; നിന്‍റെ പുത്രിമാരെ പാര്‍ശ്വത്തിങ്കൽ വഹിച്ചുകൊണ്ടു വരും.
5അപ്പോള്‍ നീ കണ്ടു ശോഭിക്കും; നിന്‍റെ ഹൃദയം പിടച്ചു വികസിക്കും; സമുദ്രത്തിന്‍റെ ധനം നിന്‍റെ അടുക്കൽ ചേരും; ജാതികളുടെ സമ്പത്തു നിന്‍റെ അടുക്കൽ വരും.
6ഒട്ടകങ്ങളുടെ കൂട്ടവും മിദ്യാനിലെയും ഏഫയിലെയും ചിറ്റൊട്ടകങ്ങളും നിന്നെ മൂടും; ശേബയിൽനിന്ന് അവരൊക്കെയും വരും; പൊന്നും കുന്തുരുക്കവും അവര്‍ കൊണ്ടുവന്നു യഹോവയുടെ സ്തുതിയെ ഘോഷിക്കും.
7കേദാരിലെ ആടുകളൊക്കെയും നിന്‍റെ അടുക്കൽ ഒന്നിച്ചുകൂടും; നെബായോത്തിലെ മുട്ടാടുകള്‍ നിനക്കു ശുശ്രൂഷചെയ്യും; അവ പ്രസാദമുള്ള യാഗമായി എന്‍റെ പീഠത്തിന്മേൽ വരും; അങ്ങനെ ഞാന്‍ എന്‍റെ മഹത്ത്വമുള്ള ആലയത്തെ മഹത്ത്വപ്പെടുത്തും.
8മേഘംപോലെയും തങ്ങളുടെ കിളിവാതിലുകളിലേക്കു പ്രാവുകളെപ്പോലെയും പറന്നുവരുന്ന ഇവര്‍ ആര്‍?
9ദൂരത്തുനിന്നു നിന്‍റെ മക്കളെ അവരുടെ പൊന്നും വെള്ളിയുമായി നിന്‍റെ ദൈവമായ യഹോവയുടെ നാമത്തിനും അവന്‍ നിന്നെ മഹത്ത്വപ്പെടുത്തിയിരിക്കകൊണ്ടു യിസ്രായേലിന്‍റെ പരിശുദ്ധനും കൊണ്ടുവരേണ്ടതിനു ദ്വീപുവാസികളും തര്‍ശ്ശീശ്കപ്പലുകള്‍ ആദ്യമായും എനിക്കായി കാത്തിരിക്കുന്നു.
10അന്യജാതിക്കാര്‍ നിന്‍റെ മതിലുകളെ പണിയും; അവരുടെ രാജാക്കന്മാര്‍ നിനക്കു ശുശ്രൂഷചെയ്യും; എന്‍റെ ക്രോധത്തിൽ ഞാന്‍ നിന്നെ അടിച്ചു; എങ്കിലും എന്‍റെ പ്രീതിയിൽ എനിക്കു നിന്നോടു കരുണ തോന്നും.
11ജാതികളുടെ സമ്പത്തിനെയും യാത്രാസംഘത്തിൽ അവരുടെ രാജാക്കന്മാരെയും നിന്‍റെ അടുക്കൽ കൊണ്ടുവരേണ്ടതിനു നിന്‍റെ വാതിലുകള്‍ രാവും പകലും അടയ്ക്കപ്പെടാതെ എല്ലായ്പോഴും തുറന്നിരിക്കും.
12നിന്നെ സേവിക്കാത്ത ജാതിയും രാജ്യവും നശിച്ചുപോകും; ആ ജാതികള്‍ അശേഷം ശൂന്യമായിപ്പോകും.
13എന്‍റെ വിശുദ്ധമന്ദിരമുള്ള സ്ഥലത്തിനു ഭംഗിവരുത്തുവാനായി ലെബാനോന്‍റെ മഹത്ത്വവും സരളവൃക്ഷവും പയിനും പുന്നയും ഒരുപോലെ നിന്‍റെ അടുക്കൽ വരും; അങ്ങനെ ഞാന്‍ എന്‍റെ പാദസ്ഥാനത്തെ മഹത്ത്വീകരിക്കും.
14നിന്നെ ക്ലേശിപ്പിച്ചവരുടെ പുത്രന്മാര്‍ നിന്‍റെ അടുക്കൽ വണങ്ങിക്കൊണ്ടു വരും; നിന്നെ നിന്ദിച്ചവരൊക്കെയും നിന്‍റെ കാൽ പിടിച്ചു നമസ്കരിക്കും; അവര്‍ നിന്നെ യഹോവയുടെ നഗരം എന്നും യിസ്രായേലിന്‍ പരിശുദ്ധന്‍റെ സീയോന്‍ എന്നും വിളിക്കും.
15ആരും കടന്നുപോകാതവണ്ണം നീ നിര്‍ജനവും ദ്വേഷവിഷയവും ആയിരുന്നതിനു പകരം ഞാന്‍ നിന്നെ നിത്യമാഹാത്മ്യവും തലമുറതലമുറയായുള്ള ആനന്ദവും ആക്കിത്തീര്‍ക്കും.
16നീ ജാതികളുടെ പാൽ കുടിക്കും; രാജാക്കന്മാരുടെ മുല കുടിക്കും; യഹോവയായ ഞാന്‍ നിന്‍റെ രക്ഷകന്‍ എന്നും യാക്കോബിന്‍റെ വല്ലഭന്‍ നിന്‍റെ വീണ്ടെടുപ്പുകാരന്‍ എന്നും നീ അറിയും.
17ഞാന്‍ താമ്രത്തിനു പകരം സ്വര്‍ണം വരുത്തും; ഇരുമ്പിനു പകരം വെള്ളിയും മരത്തിനു പകരം താമ്രവും കല്ലിനു പകരം ഇരുമ്പും വരുത്തും; ഞാന്‍ സമാധാനത്തെ നിനക്കു നായകന്മാരും നീതിയെ നിനക്ക് അധിപതിമാരും ആക്കും.
18ഇനി നിന്‍റെ ദേശത്തു സാഹസവും നിന്‍റെ അതിരിനകത്തു ശൂന്യവും നാശവും കേള്‍ക്കയില്ല; നിന്‍റെ മതിലുകള്‍ക്കു രക്ഷ എന്നും നിന്‍റെ വാതിലുകള്‍ക്കു സ്തുതി എന്നും നീ പേര്‍ പറയും.
19ഇനി പകൽനേരത്തു നിന്‍റെ വെളിച്ചം സൂര്യനല്ല; നിനക്കു നിലാവെട്ടം തരുന്നതു ചന്ദ്രനുമല്ല; യഹോവ നിനക്കു നിത്യപ്രകാശവും നിന്‍റെ ദൈവം നിന്‍റെ തേജസ്സും ആകുന്നു.
20നിന്‍റെ സൂര്യന്‍ ഇനി അസ്തമിക്കയില്ല; നിന്‍റെ ചന്ദ്രന്‍ മറഞ്ഞുപോകയുമില്ല; യഹോവ നിന്‍റെ നിത്യപ്രകാശമായിരിക്കും; നിന്‍റെ ദുഃഖകാലം തീര്‍ന്നുപോകും.
21നിന്‍റെ ജനമൊക്കെയും നീതിമാന്മാരാകും; ഞാന്‍ മഹത്ത്വപ്പെടേണ്ടതിനു എന്‍റെ നടുതലയുടെ മുളയും എന്‍റെ കൈകളുടെ പ്രവൃത്തിയും ആയിട്ട് അവര്‍ ദേശത്തെ സദാകാലത്തേക്കു കൈവശമാക്കും.
22കുറഞ്ഞവന്‍ ആയിരവും ചെറിയവന്‍ മഹാജാതിയും ആയിത്തീരും; യഹോവയായ ഞാന്‍ തക്കസമയത്ത് അതിനെ ശീഘ്രമായി നിവര്‍ത്തിക്കും.