ആവര്‍ത്തനപുസ്തകം 2

¹അനന്തരം യഹോവ എന്നോടു കല്പിച്ചതുപോലെ നാം തിരിഞ്ഞു ചെങ്കടൽ വഴിയായി മരുഭൂമിയിലേക്കു യാത്ര പുറപ്പെട്ടു; നാം ഏറിയനാള്‍ സേയീര്‍പര്‍വതത്തെ ചുറ്റിനടന്നു.

²പിന്നെ യഹോവ എന്നോടു കല്പിച്ചത്:

³നിങ്ങള്‍ ഈ പര്‍വതം ചുറ്റിനടന്നതു മതി; വടക്കോട്ടു തിരിവിന്‍.

⁴നീ ജനത്തോടു കല്പിക്കേണ്ടത് എന്തെന്നാൽ: സേയീരിൽ കുടിയിരിക്കുന്ന ഏശാവിന്‍റെ മക്കളായ നിങ്ങളുടെ സഹോദരന്മാരുടെ അതിരിൽക്കൂടി നിങ്ങള്‍ കടപ്പാന്‍ പോകുന്നു. അവര്‍ നിങ്ങളെ പേടിക്കും; ആകയാൽ ഏറ്റവും സൂക്ഷിച്ചുകൊള്ളേണം.

⁵നിങ്ങള്‍ അവരോടു പടയെടുക്കരുത്: അവരുടെ ദേശത്തു ഞാന്‍ നിങ്ങള്‍ക്ക് ഒരു കാൽ വയ്പാന്‍പോലും ഇടംതരികയില്ല; സേയീര്‍പര്‍വതം ഞാന്‍ ഏശാവിന് അവകാശമായി കൊടുത്തിരിക്കുന്നു.

⁶നിങ്ങള്‍ അവരോട് ആഹാരം വിലയ്ക്കു വാങ്ങി കഴിക്കേണം; വെള്ളവും വിലയ്ക്കു വാങ്ങി കുടിക്കേണം.

⁷നിന്‍റെ ദൈവമായ യഹോവ നിന്‍റെ കൈകളുടെ സകല പ്രവൃത്തിയിലും നിന്നെ അനുഗ്രഹിച്ചിരിക്കുന്നു; ഈ മഹാമരുഭൂമിയിൽ നീ സഞ്ചരിക്കുന്നത് അവന്‍ അറിഞ്ഞിരിക്കുന്നു; ഈ നാല്പതു സംവത്സരം നിന്‍റെ ദൈവമായ യഹോവ നിന്നോടുകൂടെ ഇരുന്നു; നിനക്കു യാതൊന്നിനും മുട്ടും വന്നിട്ടില്ല.

⁸അങ്ങനെ നാം സേയീരിൽ കുടിയിരുന്ന ഏശാവിന്‍റെ മക്കളായ നമ്മുടെ സഹോദരന്മാരെ ഒഴിച്ച് അരാബാവഴിയായി ഏലാത്തിന്‍റെയും എസ്യോന്‍-ഗേബെരിന്‍റെയും അരികത്തുകൂടി കടന്നിട്ട് തിരിഞ്ഞ് മോവാബുമരുഭൂമിയിലേക്കുള്ള വഴിയായി കടന്നുപോന്നു.

⁹അപ്പോള്‍ യഹോവ എന്നോടു കല്പിച്ചത്: മോവാബ്യരെ ഞെരുക്കരുത്; അവരോടു പടയെടുക്കയും അരുത്; ഞാന്‍ അവരുടെ ദേശത്തു നിനക്ക് ഒരു അവകാശം തരികയില്ല; ആര്‍ദേശത്തെ ഞാന്‍ ലോത്തിന്‍റെ മക്കള്‍ക്ക് അവകാശമായി കൊടുത്തിരിക്കുന്നു-

¹⁰വലിപ്പവും പെരുപ്പവും അനാക്യരെപ്പോലെ പൊക്കവുമുള്ള ജാതിയായ ഏമ്യര്‍ പണ്ട് അവിടെ പാര്‍ത്തിരുന്നു.

¹¹ഇവരെ അനാക്യരെപ്പോലെ മല്ലന്മാര്‍ എന്നു വിചാരിച്ചുവരുന്നു; മോവാബ്യരോ അവര്‍ക്ക് ഏമ്യര്‍ എന്നു പേര്‍ പറയുന്നു.

¹²ഹോര്യരും പണ്ടു സേയീരിൽ പാര്‍ത്തിരുന്നു; എന്നാൽ ഏശാവിന്‍റെ മക്കള്‍ അവരെ തങ്ങളുടെ മുമ്പിൽനിന്നു നീക്കിക്കളകയും സംഹരിക്കയും അവര്‍ക്കു പകരം കുടിപാര്‍ക്കയും ചെയ്തു; യിസ്രായേലിനു യഹോവ കൊടുത്ത അവകാശദേശത്ത് അവര്‍ ചെയ്തതുപോലെ തന്നെ.

¹³ഇപ്പോള്‍ എഴുന്നേറ്റു സേരെദുതോടു കടപ്പിന്‍ എന്നു കല്പിച്ചതുപോലെ നാം സേരെദുതോട് കടന്നു;

¹⁴നാം കാദേശ്-ബര്‍ന്നേയയിൽനിന്നു പുറപ്പെട്ടതുമുതൽ സേരെദുതോടു കടക്കുംവരെയുള്ള കാലം മുപ്പത്തെട്ടു സംവത്സരം ആയിരുന്നു; അതിനിടയിൽ യോദ്ധാക്കളായിരുന്ന തലമുറയൊക്കെയും യഹോവ അവരോടു സത്യം ചെയ്തതുപോലെ പാളയത്തിൽനിന്നു മുടിഞ്ഞുപോയി.

¹⁵അവര്‍ മുടിഞ്ഞുതീരുംവരെ യഹോവയുടെ കൈ അവരെ പാളയത്തിൽനിന്നു നശിപ്പിപ്പാന്‍ തക്കവണ്ണം അവര്‍ക്കു വിരോധമായിരുന്നു.

¹⁶ഇങ്ങനെ യോദ്ധാക്കളൊക്കെയും ജനത്തിന്‍റെ ഇടയിൽനിന്നു മരിച്ച് ഒടുങ്ങിയശേഷം

¹⁷യഹോവ എന്നോടു കല്പിച്ചത്:

¹⁸നീ ഇന്ന് ആര്‍ എന്ന മോവാബ്യദേശത്തുകൂടി കടപ്പാന്‍ പോകുന്നു.

¹⁹അമ്മോന്യരോട് അടുത്തുചെല്ലുമ്പോള്‍ അവരെ ഞെരുക്കരുത്; അവരോടു പടയെടുക്കയും അരുത്; ഞാന്‍ അമ്മോന്യരുടെ ദേശത്തു നിനക്ക് അവകാശം തരികയില്ല; അതു ഞാന്‍ ലോത്തിന്‍റെ മക്കള്‍ക്ക് അവകാശമായി കൊടുത്തിരിക്കുന്നു.

²⁰അതും മല്ലന്മാരുടെ ദേശമെന്നു വിചാരിച്ചുവരുന്നു; മല്ലന്മാര്‍ പണ്ട് അവിടെ പാര്‍ത്തിരുന്നു; അമ്മോന്യര്‍ അവരെ സംസുമ്മ്യര്‍ എന്നു പറയുന്നു.

²¹അവര്‍ വലിപ്പവും പെരുപ്പവും അനാക്യരെപ്പോലെ പൊക്കവുമുള്ള ജാതിയായിരുന്നു; എങ്കിലും യഹോവ അവരെ അവരുടെ മുമ്പിൽനിന്നു നശിപ്പിച്ചു; ഇങ്ങനെ അവര്‍ അവരുടെ ദേശം കൈവശമാക്കി അവരുടെ സ്ഥലത്തു കുടിപാര്‍ത്തു.

²²അവന്‍ സേയീരിൽ പാര്‍ക്കുന്ന ഏശാവിന്‍റെ മക്കള്‍ക്കുവേണ്ടി ചെയ്തതുപോലെതന്നെ, അവന്‍ ഹോര്യരെ അവരുടെ മുമ്പിൽനിന്നു നശിപ്പിച്ചിട്ട് അവര്‍ അവരുടെ ദേശം കൈവശമാക്കി അവരുടെ സ്ഥലത്ത് ഇന്നുവരെയും പാര്‍ക്കുന്നു.

²³കഫ്തോരിൽനിന്നു വന്ന കഫ്തോര്യരും ഗസ്സാവരെയുള്ള ഊരുകളിൽ പാര്‍ത്തിരുന്ന അവ്യരെ നശിപ്പിച്ച് അവരുടെ സ്ഥലത്തു കുടിപാര്‍ത്തു.

²⁴നിങ്ങള്‍ എഴുന്നേറ്റു യാത്ര പുറപ്പെട്ട് അര്‍ന്നോന്‍താഴ്വര കടപ്പിന്‍; ഇതാ, ഞാന്‍ ഹെശ്ബോനിലെ അമോര്യരാജാവായ സീഹോനെയും അവന്‍റെ ദേശത്തെയും നിന്‍റെ കൈയിൽ ഏല്പിച്ചിരിക്കുന്നു; അവനോടു പടവെട്ടി അതു കൈവശമാക്കുവാന്‍ തുടങ്ങുക.

²⁵നിന്നെയുള്ള പേടിയും ഭീതിയും ആകാശത്തിന്‍കീഴെങ്ങും ഉള്ള ജാതികളുടെമേൽ വരുത്തുവാന്‍ ഞാന്‍ ഇന്നുതന്നെ തുടങ്ങും; അവര്‍ നിന്‍റെ ശ്രുതി കേട്ടു നിന്‍റെ നിമിത്തം വിറയ്ക്കുകയും നടുങ്ങുകയും ചെയ്യും.

²⁶പിന്നെ ഞാന്‍ കെദേമോത്ത് മരുഭൂമിയിൽനിന്നു ഹെശ്ബോനിലെ രാജാവായ സീഹോന്‍റെ അടുക്കൽ സമാധാനവാക്കുകളോടുകൂടെ ദൂതന്മാരെ അയച്ചു:

²⁷ഞാന്‍ നിന്‍റെ ദേശത്തുകൂടി കടന്നുപോകുവാന്‍ അനുവദിക്കേണമേ; ഞാന്‍ ഇടത്തോട്ടോ വലത്തോട്ടോ മാറാതെ പെരുവഴിയിൽക്കൂടി മാത്രം നടക്കും.

²⁸സേയീരിൽ പാര്‍ക്കുന്ന ഏശാവിന്‍റെ മക്കളും ആരിൽ പാര്‍ക്കുന്ന മോവാബ്യരും എനിക്കു തന്നതുപോലെ നീ വിലയ്ക്കു തരുന്ന ആഹാരം ഞാന്‍ കഴിക്കയും വിലയ്ക്കു തരുന്ന വെള്ളം കുടിക്കയും ചെയ്തുകൊള്ളാം.

²⁹യോര്‍ദ്ദാന്‍ കടന്ന് ഞങ്ങളുടെ ദൈവമായ യഹോവ ഞങ്ങള്‍ക്കു തരുന്ന ദേശത്ത് എത്തുവോളം കാൽനടയായി പോകുവാന്‍ മാത്രം അനുവദിക്കേണം എന്നു പറയിച്ചു.

³⁰എന്നാൽ നാം തന്‍റെ ദേശത്തുകൂടി കടന്നുപോകുവാന്‍ ഹെശ്ബോനിലെ രാജാവായ സീഹോന്‍ സമ്മതിച്ചില്ല; ഇന്നു കാണുന്നതുപോലെ നിന്‍റെ ദൈവമായ യഹോവ അവനെ നിന്‍റെ കൈയിൽ ഏല്പിക്കേണ്ടതിന് അവന്‍റെ മനസ്സു കടുപ്പിച്ച് അവന്‍റെ ഹൃദയം കഠിനമാക്കി.

³¹യഹോവ എന്നോട്: ഞാന്‍ സീഹോനെയും അവന്‍റെ ദേശത്തെയും നിന്‍റെ കൈയിൽ ഏല്പിച്ചിരിക്കുന്നു; അവന്‍റെ ദേശം കൈവശമാക്കേണ്ടതിന് അത് അടക്കുവാന്‍ തുടങ്ങുക എന്നു കല്പിച്ചു.

³²അങ്ങനെ സീഹോനും അവന്‍റെ സര്‍വജനവും നമ്മുടെ നേരേ പുറപ്പെട്ടുവന്നു യാഹാസിൽവച്ചു പടയേറ്റു.

³³നമ്മുടെ ദൈവമായ യഹോവ അവനെ നമ്മുടെ കൈയിൽ ഏല്പിച്ചു; നാം അവനെയും അവന്‍റെ പുത്രന്മാരെയും അവന്‍റെ സര്‍വജനത്തെയും സംഹരിച്ചു.

³⁴അക്കാലത്തു നാം അവന്‍റെ എല്ലാ പട്ടണങ്ങളും പിടിച്ചു പട്ടണംതോറും പുരുഷന്മാരെയും സ്ത്രീകളെയും കുഞ്ഞുങ്ങളെയും ഉന്മൂലനാശം ചെയ്തു; ഒരുത്തനെയും ശേഷിപ്പിച്ചില്ല.

³⁵നാല്ക്കാലികളെയും നാം പിടിച്ച പട്ടണങ്ങളിലെ കൊള്ളയും മാത്രം നാം നമുക്കായിട്ട് എടുത്തു.

³⁶അര്‍ന്നോന്‍താഴ്വരയുടെ അറ്റത്തുള്ള അരോവേരും താഴ്വരയിലെ പട്ടണവുംമുതൽ ഗിലെയാദുവരെ നമ്മുടെ കൈക്ക് എത്താതെ ഒരു പട്ടണവും ഉണ്ടായിരുന്നില്ല; നമ്മുടെ ദൈവമായ യഹോവ സകലവും നമ്മുടെ കൈയിൽ ഏല്പിച്ചു.

³⁷അമ്മോന്യരുടെ ദേശവും യബ്ബോക്നദിയുടെ ഒരു വശമൊക്കെയും മലനാട്ടിലെ പട്ടണങ്ങളും നമ്മുടെ ദൈവമായ യഹോവ നമ്മോടു വിലക്കിയ ഇടങ്ങളും മാത്രം നീ ആക്രമിച്ചില്ല.