അപ്പൊ. പ്രവൃത്തികള്‍ 14

¹ഇക്കോന്യയില്‍ അവര്‍ ഒരുമിച്ചു യെഹൂദന്മാരുടെ പള്ളിയില്‍ ചെന്നു യെഹൂദന്മാരിലും യവനന്മാരിലും വലിയൊരു പുരുഷാരം വിശ്വസിപ്പാന്‍ തക്കവണ്ണം സംസാരിച്ചു.

²വിശ്വസിക്കാത്ത യെഹൂദന്മാരോ ജാതികളുടെ മനസ്സ് സഹോദരന്മാരുടെ നേരേ ഇളക്കി വഷളാക്കി.

³എന്നാല്‍ അവര്‍ വളരെക്കാലം അവിടെ പാര്‍ത്തു, കര്‍ത്താവില്‍ ആശ്രയിച്ചു പ്രാഗല്ഭ്യത്തോടെ പ്രസംഗിച്ചുകൊണ്ടിരുന്നു; അവന്‍ തന്‍റെ കൃപയുടെ വചനത്തിനു സാക്ഷിനിന്ന്, അവരുടെ കൈയാല്‍ അടയാളങ്ങളും അദ്ഭുതങ്ങളും ഉണ്ടാകുവാന്‍ വരം നല്കി.

⁴എന്നാല്‍ പട്ടണത്തിലെ ജനസമൂഹം ഭിന്നിച്ചു ചിലര്‍ യെഹൂദന്മാരുടെ പക്ഷത്തിലും ചിലര്‍ അപ്പൊസ്തലന്മാരുടെ പക്ഷത്തിലും ആയി.

⁵അവരെ അവമാനിപ്പാനും കല്ലെറിവാനും ജാതികളും യെഹൂദന്മാരും അവിടത്തെ പ്രമാണികളോടുകൂടി ഒരു ആക്രമം ഭാവിച്ചപ്പോള്‍ അവര്‍ അത് ഗ്രഹിച്ചു

⁶ലുസ്ത്ര, ദെര്‍ബ്ബ എന്ന ലുക്കവോന്യപട്ടണങ്ങളിലേക്കും ചുറ്റുമുള്ള ദേശത്തിലേക്കും ഓടിപ്പോയി

⁷അവിടെ സുവിശേഷം അറിയിച്ചുപോന്നു.

⁸ലുസ്ത്രയില്‍ അമ്മയുടെ ഗര്‍ഭംമുതല്‍ മുടന്തനായി ഒരിക്കലും നടന്നിട്ടില്ലാതെയും കാലിനു ശക്തിയില്ലാതെയും ഉള്ളൊരു പുരുഷന്‍ ഇരുന്നിരുന്നു.

⁹അവന്‍ പൗലൊസ് സംസാരിക്കുന്നത് കേട്ടു; അവന്‍ അവനെ ഉറ്റുനോക്കി, സൗഖ്യം പ്രാപിപ്പാന്‍ അവനു വിശ്വാസമുണ്ട് എന്നു കണ്ടിട്ട്:

¹⁰നീ എഴുന്നേറ്റു കാലൂന്നി നിവിര്‍ന്നുനില്ക്ക എന്ന് ഉറക്കെ പറഞ്ഞു; അവന്‍ കുതിച്ചെഴുന്നേറ്റു നടന്നു.

¹¹പൗലൊസ് ചെയ്തതു പുരുഷാരം കണ്ടിട്ടു: ദേവന്മാര്‍ മനുഷ്യരൂപത്തില്‍ നമ്മുടെ അടുക്കല്‍ ഇറങ്ങി വന്നിരിക്കുന്നു എന്ന് ലുക്കവോന്യഭാഷയില്‍ നിലവിളിച്ചു പറഞ്ഞു.

¹²ബര്‍ന്നബാസിന് ഇന്ദ്രന്‍ എന്നും പൗലൊസ് മുഖ്യപ്രസംഗിയാകയാല്‍ അവനു ബുധന്‍ എന്നും പേര്‍ വിളിച്ചു.

¹³പട്ടണത്തിന്‍റെ മുമ്പിലുള്ള ഇന്ദ്രക്ഷേത്രത്തിലെ പുരോഹിതന്‍ കാളകളെയും പൂമാലകളെയും ഗോപുരത്തിങ്കല്‍ കൊണ്ടുവന്നു പുരുഷാരത്തോടുകൂടെ യാഗം കഴിപ്പാന്‍ ഭാവിച്ചു.

¹⁴ഇത് അപ്പൊസ്തലന്മാരായ ബര്‍ന്നബാസും പൗലൊസും കേട്ടിട്ടു വസ്ത്രം കീറിക്കൊണ്ടു പുരുഷാരത്തിന്‍റെ ഇടയിലേക്ക് ഓടിച്ചെന്നു നിലവിളിച്ചു പറഞ്ഞത്:

¹⁵പുരുഷന്മാരേ, നിങ്ങള്‍ ഈ ചെയ്യുന്നത് എന്ത്? ഞങ്ങള്‍ നിങ്ങളോടു സമസ്വഭാവമുള്ള മനുഷ്യര്‍ അത്രേ; നിങ്ങള്‍ ഈ വ്യര്‍ഥകാര്യങ്ങളെ വിട്ടു, ആകാശവും ഭൂമിയും സമുദ്രവും അവയിലുള്ള സകലവും ഉണ്ടാക്കിയ ജീവനുള്ള ദൈവത്തിങ്കലേക്കു തിരിയേണം എന്നുള്ള സുവിശേഷം ഞങ്ങള്‍ നിങ്ങളോട് അറിയിക്കുന്നു.

¹⁶കഴിഞ്ഞ കാലങ്ങളില്‍ അവന്‍ സകല ജാതികളെയും സ്വന്തവഴികളില്‍ നടപ്പാന്‍ സമ്മതിച്ചു.

¹⁷എങ്കിലും അവന്‍ നന്മ ചെയ്കയും ആകാശത്തുനിന്നു മഴയും ഫലപുഷ്ടിയുള്ള കാലങ്ങളും നിങ്ങള്‍ക്കു തരികയും ആഹാരവും സന്തോഷവും നല്കി നിങ്ങളെ തൃപ്തരാക്കുകയും ചെയ്തു പോന്നതിനാല്‍ തന്നെക്കുറിച്ചു സാക്ഷ്യം തരാതിരുന്നിട്ടില്ല.

¹⁸അവര്‍ ഇങ്ങനെ പറഞ്ഞു തങ്ങള്‍ക്കു യാഗം കഴിക്കാതവണ്ണം പുരുഷാരത്തെ പ്രയാസത്തോടെ തടുത്തു.

¹⁹എന്നാല്‍ അന്ത്യൊക്യയില്‍നിന്നും ഇക്കോന്യയില്‍നിന്നും യെഹൂദന്മാര്‍ വന്നു കൂടി പുരുഷാരത്തെ വശത്താക്കി പൗലൊസിനെ കല്ലെറിഞ്ഞു; അവന്‍ മരിച്ചു എന്ന് വിചാരിച്ചിട്ട് അവനെ പട്ടണത്തിനു പുറത്തേക്ക് ഇഴച്ചുകളഞ്ഞു.

²⁰എന്നാല്‍ ശിഷ്യന്മാര്‍ അവനെ ചുറ്റിനില്ക്കയില്‍ അവന്‍ എഴുന്നേറ്റു പട്ടണത്തില്‍ ചെന്നു; പിറ്റന്നാള്‍ ബര്‍ന്നബാസിനോടുകൂടെ ദെര്‍ബ്ബയ്ക്കു പോയി.

²¹ആ പട്ടണത്തിലും സുവിശേഷം അറിയിച്ചു പലരെയും ശിഷ്യരാക്കിയശേഷം അവര്‍ ലുസ്ത്ര, ഇക്കോന്യ, അന്ത്യൊക്യ എന്ന പട്ടണങ്ങളിലേക്കു മടങ്ങിച്ചെന്നു,

²²വിശ്വാസത്തില്‍ നിലനില്ക്കേണം എന്നും നാം അനേകം കഷ്ടങ്ങളില്‍ക്കൂടി ദൈവരാജ്യത്തില്‍ കടക്കേണ്ടതാകുന്നു എന്നും പ്രബോധിപ്പിച്ചു ശിഷ്യന്മാരുടെ മനസ്സ് ഉറപ്പിച്ചുപോന്നു.

²³അവര്‍ സഭതോറും അവര്‍ക്കു മൂപ്പന്മാരെ നിയമിക്കയും ഉപവസിച്ചും പ്രാര്‍ഥിച്ചുംകൊണ്ടു തങ്ങള്‍ വിശ്വസിച്ച കര്‍ത്താവിങ്കല്‍ അവരെ ഭരമേല്പിക്കയും ചെയ്തു.

²⁴അവര്‍ പിസിദ്യയില്‍ക്കൂടി കടന്നു പംഫുല്യയില്‍ എത്തി,

²⁵പെര്‍ഗ്ഗയില്‍ വചനം പ്രസംഗിച്ചശേഷം അത്തല്യക്കു പോയി.

²⁶അവിടെനിന്നു കപ്പല്‍ കയറി അന്ത്യൊക്യയിലേക്കു പോയി; തങ്ങള്‍ നിവര്‍ത്തിച്ച വേലയ്ക്കായി ദൈവകൃപയില്‍ അവരെ ഭരമേല്പിച്ചയച്ചത് അവിടെനിന്ന് ആയിരുന്നുവല്ലോ.

²⁷അവിടെ എത്തിയശേഷം സഭയെ ഒരുമിച്ചു കൂട്ടി, ദൈവം തങ്ങളോടുകൂടെ ഇരുന്നു ചെയ്തതൊക്കെയും ജാതികള്‍ക്കു വിശ്വാസത്തിന്‍റെ വാതില്‍തുറന്നു കൊടുത്തതും അറിയിച്ചു.

²⁸പിന്നെ അവന്‍ ശിഷ്യന്മാരോടുകൂടെ കുറെക്കാലം അവിടെ പാര്‍ത്തു.